Монгол Улсын Их Хурлын дэд дарга Л.Мөнхбаатар БНХАУ-д болсон Монгол Улсын Их Хурал, Бүх Хятадын Ардын Төлөөлөгчдийн Их Хурал хоорондын Байнгын уулзалтын механизмын тавдугаар уулзалтад оролцох үеэрээ Ордос хотоор зочилж, Нарны сэргээгдэх эрчим хүчний тэргүүлэгч баазтай танилцлаа.
Нарны сэргээгдэх эрчим хүчний тэргүүлэгч бааз
2022 оны 8 дугаар сард Хятадын Хөгжил шинэтгэлийн хорооноос зөвшөөрч нийт 4.9 тэрбум юанийн хөрөнгө оруулалтаар 8 сая кВт-ын нарны сэргээгдэх эрчим хүч, 4 сая кВт-ын салхины сэргээгдэх эрчим хүчний төслийг хэрэгжүүлэхээр шийдвэрлэсэн аж.
Өнөөдрийн байдлаар тус төслийн үр дүнд Далайт хошууны элсэн цөлийн 25%-ийг ногооруулаад байна. Нийт 2.24 тэрбум юанийн хөрөнгөөр тус бүс нутагт хөрөнгө оруулж Бээжин, Тяньжин хотын элсэн шуурганы эх үүсвэрийг хянаж байна. Тус төслийн хүрээнд нийт 178,000 га газар ой мод, 309,000 га газарт хээр талын ногоон бүтээн байгуулалтыг хийсэн байна. Ой болон хээр талын ургамлын бүрхэвч 59.27%, шар шорооны хэмжээ 9.9 сая тонноор буурсан байна. Энэхүү төсөл нь нарны эрчим хүчний панелын тусламжтай элсний нүүдэлд хяналт тавьж, жил бүр Бээжин, Тяньжин, Хэбэй хот мужуудад 40 тэрбум кВт сэргээгдэх эрчим хүчийг нийлүүлж байна.