Туркийн ерөнхийлөгч Режеп Тайип Эрдоган Украины үр тариаг экспортлох хэлэлцээр хийх зорилгоор ОХУ-ын Ерөнхийлөгч Владимир Путинтэй уулзсан байна.
Тодруулбал Туркийн Ерөнхийлөгч 2023 оны 9-р сарын 4-ний даваа гаригт буюу өчигдөр ОХУ-ын Ерөнхийлөгч Владимир Путинтэй уулзаж Украины үр тариаг экспорт хийх хэлэлцээр хийхийг ятгасан байна. Хамгийн сүүлд, энэхүү уулзалтаас өмнө Ерөнхийлөгч Владимир Путин, Режеп Тайип Эрдоган нар 2021 оны 9 дүгээр сарын 29-ний Лхагва гарагт ОХУ-ын Сочи хотын Хар тэнгисийн амралтын газарт Бохаровын Ручейгийн байранд уулзаж байсан юм.
Туркийн удирдагч Режеп Тайип Эрдоган нь ОХУ-ыг дайныг үл харгалзан Хар тэнгисийн гурван боомтоос үр тариа болон бусад бараа бүтээгдэхүүн экспортлох боломж олгох хэлэлцээр хийхийг хүссэн байна.
Дашрамд хэлэхэд, ОХУ-ын Ерөнхийлөгч Владимир Путин өнгөрөгч 7 дугаар сард Турк болон НҮБ-ын хамтран байгуулсан хэлэлцээрийг сунгахаас татгалзсан юм. Тэрээр “ОХУ-д мөн адил хүнс, бордоо экспортлоход саад учирч байна. Украинтай ижил төстэй нөхцөл байдал үүссэн байхад хэлэлцээрийг хүндэтгээгүй” хэмээн үзэж Украины хэлэлцээрийг сунгахаас татгалзсан юм. Мөн тэрээр хэдийгээр өнгөрсөн жилээс хойш улаан буудайн экспортыг дээд цэгт нь хүргэж байгаа ч усан онгоц, даатгалын хязгаарлалт, хөдөө аж ахуйн худалдаанд нь саад болсон гэжээ.
ОХУ-ын Ерөнхийлөгч Владимир Путин үр тарианы экспортын хэлэлцээрээс татгалзсанаасаа хойш Турк, Африк, Ойрх Дорнод, Азийн зарим орнуудад хүнсний хямрал үүсэж болзошгүй нөхцөл байдалтай байгаа. Үүнээс зайлсхийхэд туслах арга хэмжээ зохион байгуулна гэж Путин удаа дараа амласан юм. Украин болон ОХУ нь эдгээр хөгжиж буй орнуудын улаан буудай, арвай, наран цэцгийн тос төдийгүй бусад бараа бүтээгдэхүүнийх нь гол нийлүүлэгчид юм.
Орчуулсан Э.Энхчимэг
