Дэлхийд анх удаа амьд хүний тархинаас өт олсон тохиолдол гарсан байна. 64 настай Австрали эмэгтэй хэдэн сарын турш ходоод нь өвдөж, ханиалгаж, шөнийн цагаар унтаж чадахгүй их хэмжээгээр хөлрөх зэрэг шинж тэмдэг илэрч улмаар мартамхай болж сүүлдээ сэтгэл гутралтай болсон байна. Тэрээр 2021 оны 1 дүгээр сарын сүүлчээр эмнэлэгт хандсан бөгөөд ингэхэд түүний тархины баруун урд талын хэсэгт ердийн өвчин илэрчээ.
Үүнээс жил гаруйн хугацааны дараа түүний өвчний жинхэнэ шалтгаан болох өтийг эдийн шинжилгээгээр илрүүлжээ.
Түүний тархинд 8 см урттай улаан паразит хорхой амьд байсан байна. Тэрээр Шинэ Өмнөд Уэльсийн зүүн өмнөд хэсэгт нуурын ойролцоо амьдардаг байжээ. Түүнд тохиолдсон энэхүү үйл явдал нь хүний тархинд хорхой үржсэн анхны тохиолдол гэж судлаачид тэмдэглээд байна.
Хорхойг олсон мэдрэлийн мэс засалч Хари Прия Банди хэлэхдээ : Хорхой скайнерт хачирхалтайгаар илэрч тархины хэсэгт харагдаж эхэлсэн бөгөөд тэрээр түүнийг олж хараад "Үүнээс илүү хэвийн бус зүйл хэзээ ч олж харж чадахгүй байх” гэж бодсон гэв. Үүнийг харсан хүн бүр маш их гайхсан төдийгүй өт тархины гаднах хэсэг рүү хүчтэй тэмүүлж байжээ. Энэхүү явдлын дараа амьтнаас хүнд дамжих өвчин, халдварт өвчний аюул нэмэгдэж байгааг судлаачид анхааруулсан байна.
Австрали улсын ихэнх хэсэгт амьдардаг хорт могойн биед энэхүү улаан хорхой байдаг ажээ. Эрдэмтэд тухайн эмэгтэйг амьдарч байсан газрынхаа ойролцоох нуурын дэргэдээс Уорригалын ногоон хэмээх өвсийг түүж хоол хүнсэндээ хэрэглэснээр паразитын өндгийг санамсаргүй байдлаар идсэн байж магадгүй гэж үзэж байна.
Орчуулсан Э.Энхчимэг
Эх сурвалж: BBC