Жүжигчин "The Rock" буюу Дуэйн Джонсон, сэтгүүлч Опра Уинфри нар Мауигийн гал түймэрт өртсөн Хавайн иргэдэд мөнгөн тусламж үзүүлэх сан байгуулжээ.
Мауигийн Ардын сан энэ сард түймэрт өртсөн олон мянган хохирогчдод сар бүр 1200 ам.долларын тусламж үзүүлэхийг зорьж байгаа юм. Хоёр алдартан хандив цуглуулах ажлыг эхлүүлэхийн тулд хувийн зүгээс 10 сая ам.доллар хандивласан бөгөөд цаашид олон нийтээс хандив хүсээд байна.
Одоогоор түймэрт нас барсан хүмүүсийн тоо 115 байгаа ч олон хүн сураггүй байгаа юм. Тэдний цуглуулсан хандив нь гал түймрийн улмаас гэр орон нь сүйрсэн иргэдэд тусламж болон очих бөгөөд өөрийн байшиндаа амьдарч байсан иргэдээс гадна, өөр хүний байшин түрээслэн амьдарч байсан иргэдэд мөн адил тусламж үзүүлэх аж. Харин байшингаа бусдад түрээслэн өөрөө амьдарч байгаагүй иргэдэд хамаарахгүй гэв.
Опра Уинфри хэлэхдээ: "Хамгийн хэцүү цаг үед ч Мауигийн хүмүүс нэгддэг, бид босдог. Энэ л биднийг илүү хүчирхэг болгодог. Мауигийн удирдагчид хамгийн их хохирол амссан иргэдийн гарт мөнгөн тусламжийг шууд хүргэхэд бидэнд дэмжлэг үзүүлэн ажиллаж байна. Мауигийн удирдагчидтай хамтран Мауигийн Ардын Санг эхлүүлж байгаадаа бид үнэхээр их талархаж байна" гэжээ.
Опра Уинфри нь Мауигийн түр оршин суугч бөгөөд Дуэйн Джонсонгийн хувьд хүүхэд насаа Хавайд өнгөрүүлсэн төдийгүй Самоа гаралтай жүжигчин юм.
Орчуулагч Э.Энхчимэг