Сонгууль болоход жил хүрэхгүй хугацаа үлдлээ. Намууд хийгээд нэр дэвшихээр горилогчид хөдөлгөөнд орж эхэлжээ. Нэгнээсээ ялгарсан сэдэв барьж авах гэж эсхүл нийгмийн асуудал бүр дээр зүгээр л попорч эхлэх нь тэр.
ХҮН намын тухайд л гэхэд коксжсон нүүрсний асуудал, бонд, сүүлдээ бүр сурагчдын дүрэмт хувцас дээр хүртэл асуудал болгож мэдээлэл хийлээ. Уралдаан зарлаж, уриалсан маягтай тэдний үйлдэл сонгууль дөхөж байгааг улам бүр сануулах.
Сурагчдын дүрэмт хувцастай холбоотой асуудлаар ХҮН намын боловсролын салбарын мэргэжилтнүүдийн хэлж буйгаар "Хүүхдийн дүрэмт хувцасны хувьд биеийн хөдөлгөөнд саад учруулахгүй, хөлс болон чийгийг гадагшлуулах шаардлагатай. Харин 10 жилийн өмнө үйлдвэрлэсэн дүрэмт хувцсыг өмсөхөөр олон асуудал гардаг. Биеийн хөдөлгөөнд саад учирдаг, хөлс чийг гадагшилдаггүй, үнэтэй гэдэг асуудлыг иргэдийн зүгээс удаа дараа хэлж байгаа. Дүрэмт хувцас 100-250 мянган төгрөгийн үнэтэй байна.
Дөрвөн хүүхэдтэй өрх гэхэд сая гаруй төгрөгөөр хувцас худалдаж авах санхүүгийн дарамттай бас тулгарч байгаа юм. Мөн дээрээс нь ганцхан ээлжийн дүрэмт хувцсыг байнга угааж өмсөх асуудалтай байна" гэх.
Өөрөөр хэлбэл, тэд сурагчдын дүрэмт хувцсыг шинэчлэх зайлшгүй шаардлагатай гэж үзжээ. Энэ сэдвийг нь олон хүн дэмжсэн юм байх. Тиймээс үүнийгээ санаачилга гэж үзэж шийдвэр гаргах түвшний хүмүүст уламжилна гэв.
