64 настай Австрали эмэгтэйн тархинаас амьд өт илрүүлж, энэ төрлийн халдварын анхны тохиолдлыг дэлхийд бүртгэлээ. Тодруулбал тус Австралийн иргэнд анх 2021 онд гурван долоо хоногийн турш хэвлийн доод хэсгээр хөндүүрлэх, гүйлгэх, хуурай ханиалгах, халуурах зэрэг шинж тэмдэг илэрч байсан аж.
Харин 2022 онд түүнд мартах, депрессэнд орох зэрэг шинж тэмдэг нэмж илэрсэн тул Канберрагийн эмнэлэгт ханджээ. Түүний тархинд дүрс оношилгоо хийж, улмаар хагалгаа хийхээр болсон байна.
Хагалгааны явцад найман сантиметрийн урттай, амьд өт илрүүлсэн нь эмнэлгийн ажилчдыг цочролд оруулав. Тэд тус өтийг ямар төрөл зүйлд хамаарагддаг болохыг шинжлүүлэхээр лаборатори руу илгээхэд “Офидаскарис Робертси” байсан гэв.
Энэ нь ихэвчлэн питон могойноос олддог шимэгч, дугуй өт бөгөөд уг халдвар хүнээс илэрсэн анхны тохиолдол юм. Тус эмэгтэй питон могой ихээр амьдардаг нуурын ойролцоо оршин суудаг бөгөөд могойнд нэг ч удаа хүрч байгаагүй гэнэ.
Харин нуур хавиас өвс, ургамал түүдэг байсан нь шимэгч өт өвсөөр дамжин халдсан байх магадлалтай гэх дүгнэлтэд хүргэж байгаа аж.
Тус өт нь хүнээс хүнд халддаггүй тул ковид, эбола зэрэг шиг цар тахал үүсгэхгүй. Гэхдээ питон могой дэлхийн бусад газруудаар ч оршдог тул энэ төрлийн халдвар ирээдүйд нэмэгдэж магадгүйг эрдэмтэд хэлэв.
Сүүлийн 30 гаруй жилд шинээр бүртгэгдсэн 30 халдварын гуравны нэг нь зоонозын гаралтай буюу амьтнаас хүнд дамжсан халдварууд байна.