АН-ын дарга Лу.Гантөмөр хэд хэдэн хэвлэл мэдээллийн байгууллагын сэтгүүлчдийг урин оролцуулсан тусгай нэвтрүүлэг хийжээ.
Энэ үеэрээ тэрбээр "Авлига, албан тушаалын хэрэгт холбогдсон хүмүүсийг АН-аас нэр дэвшүүлэхгүй. Шүүх тогтоогоогүй байсан ч авлигатай холбоотой энэ байдал чинь АН-д үл итгэх байдлыг бий болгох учраас өнж л гэж хэлнэ. Намын жагсаалтад хамгийн их итгэл авах хүмүүсээ оруулна" гэхчлэн сайхан ярьж гарав.
Хэрэв тэрбээр хэлсэн үгэндээ хүрэх бол 2024 оны УИХ-ын сонгуульд нүүрс болон авлигын хэргээр шалгагдаж байгаа УИХ-ын гишүүн А.Адъяасүрэн, мөн мөнгө угаах, хөрөнгө завших, эрх мэдэл албан тушаалаа урвуулан ашиглах зэрэг заалтаар яллагдагчаар татагдаж байсан УИХ-ын гишүүн Д.Бат-Эрдэнэ нарын “нүүрсний” тодотголтнууд нэр дэвшихгүй нь.
Шууд утгаараа тэдэнрүү чиглэсэн үг гэж ойлголоо.
Эргэн сануулахад, АН-ын жирийн идэвхтэн гишүүд, дэмжигчид дээрх асуудлаас болж Л.Гантөмөрт мэдэгдэл хүртэл хүргүүлж байлаа. Ингэхдээ нүүрсний хулгайн хэрэгт яллагдагчаар татагдсан УИХ-ын гишүүдийг өмгөөлж байгааг эрс эсэргүүцнэ гэж байв. Товчхондоо, нүүрсний хулгайчийн хулгайн мөнгөөр намаа худалдахыг хэрхэвч зөвшөөрөхгүй гэсэн юм.
Хэрэв дээрх нэр бүхий хүмүүс болон авлига албан тушаалын асуудлаар шалгагдаж байсан хэн нэгэн сонгуульд нэр дэвшвэл Лу.Гантөмөр хэлсэн үгнээсээ буцаж, идэвхтэн гишүүдийн эсэргүүцэл өндрөө авах биз ээ.
