Африкийн Алтан дуу хоолой, Мали улсын ард иргэдийн хамгийн хайртай дуучин гэгддэг Салиф Кейта Мали дахь төрийн эргэлтийг удирдан зохион байгуулсан хурандаа Ассими Гоитагийн тусгай зөвлөхөөр томилогдсон байна.
Түүний энэ үйлдэлд олон мянган шүтэн бишрэгчид нь дургүйцлээ илэрхийлсэн байна. Одоо 73 настай тэрээр хөгжмийн салбарт 50 жил амжилттай ажилласан төдийгүй Африкийн хөгжмийг дэлхийн тавцанд гаргасан анхдагчын нэг юм.
Салиф Кейта нь Африкийн уламжлалт хөгжмийг жааз, блюз, барууны хөгжмийн хэв маягтай хольж шинэ урсгал бий болгосон бөгөөд Грэмми-д хэд хэдэн удаа нэр дэвшиж байжээ.
Тэрээр альбинизм өвчтэй бөгөөд энэхүү өвчнөөр ялгаварлан гадуурхалтын эсрэг тууштай тэмцсээр ирсэн юм. Салиф Кейта нь 2005 онд “Глобал” нэртэй санг байгуулж, тус сангаар дамжуулан альбинизм өвчтэй хүмүүсийг дэмжин эсэргүүцлээ илэрхийлж байжээ.
Альбинизмтай хүмүүсийг Бурунди, Танзани зэрэг оронд одоо ч алах эсвэл биеийн хэсгийг нь тасдаж, зан үйлд ашигладаг байна.
Хөгжимчин Салиф Кейта багш болохыг мөрөөддөг байсан ч тухайн үед түүнийг "хүүхдүүдийг айлгана" гэж үзсэний улмаас мөрөөдлөө биелүүлж чадахгүйд хүрч байжээ. Тэрээр өөрийн олсон орлогыг удамшлын улмаас арьсны хорт хавдарт өртөмтгий, хараа муутай альбинизм өвчтэй хүмүүст эмнэлгийн тусламж үзүүлэх зорилгоор хандивлажээ.
Орчуулсан Э.Энхчимэг