Наймдугаар сарын 7-ноос 8-нд шилжих шөнө Баянзүрх дүүргийн 13-р хорооллын нутаг дэвсгэр Натурт буун дуу гарсан гэх хэргийн талаар ЦЕГ-аас мэдээлэл хийж байна.
"13-р хорооллын нутаг дэвсгэрт зэвсэгтэй этгээд иргэн У-гийн биед мэсээр халдаж, гэмтээсэн гэх дуудлагын дагуу Цагдаагийн алба хаагчид очиж ажилласан. Очиход тавьсан шаардлагийг биелүүлэхгүй "Хүүхэдтэйгээ уулзана" гэсэн бөгөөд зэвсгээ хаявал хүүхэдтэйгээ уулзах саналыг тавьсан. Гэвч гартаа гурван төрлийн хутга барьж скоцоор ороосон байсан.
Улмаар өөрийгөө болон бусдын амь насанд дахин аюул учруулах үйлдэл гаргах эрсдэлтэй гэж үзсэн. Үүний дүнд Цагдаагийн албаны тухай хуульд заасны дагуу цагдаагийн албан хаагч албадлага хэрэглэх хангалттай үндэслэл болсон.
Албан хаагч резин сумтай буу хэрэглэсэн. Иргэд 3-4 удаа буун дуу гарлаа гэж бичсэн нь цагдаагийн албан хаагч албадлага хэрэглэсэнтэй холбоотой юм. Гэмт этгээд 2002-2021 онд таван удаа ял шийтгүүлж байсан. Хар тамхи, мансууруулах төрлийн бодис хууль бусаар хадгалсан, тээвэрлэсэн гэх хэргээр шалгагдаж байсан. Цагдаагийн байгууллага мөрдөн шалгах ажиллагаа явуулж байна. Хохирогч У-гийн биеийн байдал сайн байгаа, эмнэлгийн тусламж үзүүлсэн гэв.
