Даваа гарагт Оросоос Украины Ерөнхийлөгч Володимир Зеленськийн амьдардаг Кривой Рог хот руу пуужин харважээ. Улмаар зургаан хүн амиа алдаж, 75 хүн шархадсан байна.
Хотын төвийг онилсон пуужингийн цохилтод орон сууцууд болон их сургуулийн барилга өртсөн. Ерөнхийлөгч Зеленськийн мэдэгдсэнээр амиа алдагсдын дунд 10 настай охин болон түүний ээж байсан гэв. Аврах ажиллагаанд 350 гаруй хүн оролцож байгаа аж.
Ням гарагт Украинаас Москва руу агаараас довтолсны дараа Ерөнхийлөгч Зеленський дайн Оросын нутаг дэвсгэрт ирж буйг анхааруулсан юм.
ОХУ-ын удирдлагууд Украины цэргийн баазуудыг л онилж дайрдаг гэж мэдэгдсэн ч Украинаас үүнийг үгүйсгэсэн. Тэдний хэлснээр сүүлийн үед ирсэн дайралтуудад олон иргэн өртөж, хохирч байгаа нь дайны гэмт хэргийн ул мөр гэв.
Энэ талаар Зеленсьский “Сүүлийн үед дайснууд хотын төв хэсэг, иргэдийн орон сууц зэрэг газрууд руу довтолж байна. Гэхдээ энэ үйлдэл нь биднийг айлгахгүй” хэмээн хэлжээ.
Даваа гарагт Оросын Батлан хамгаалахын сайд Сергей Шойгу Украины цэргийн баазуудад довтолгоог эрчимжүүлнэ хэмээн мэдэгдсэн.
Эх сурвалж: Ассошиэйтед Пресс