Тулгар төрийн 2232, Их Монгол Улс байгуулагдсаны 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ой, Үндэсний их баяр наадмын хүчит бөхийн барилдааны долоогийн даваа өндөрлөлөө.
Энэ даваанд улсын аварга хоёр, арслан нэг, гарди нэг, заан нэг, харцага нэг, аймаг, цэргийн арслан цолтой хоёр бөх барилдав.
АВАРГА, АРСЛАНГИЙН БАРИЛДААН ОЛОНД ХҮЛЭЭЛТ ҮҮСГЭВ
Улсын даян аварга Н.Батсуурь, Улсын арслан Ц.Содномдорж нарын барилдаан цаг гаруй үргэлжилж, олонд хүлээлт үүсгэв. Энэ хугацаанд Ц.Содномдорж арслан эмчийн туслалцаа авч, улмаар хөлийн цэц шийдвэр гаргах нөхцөл байдалд хүрэв.
Хөлийн цэцийн шийдвэрээр “Ц.Содномдорж арсланд хоёр сануулга өгсөн бөгөөд идэвхи муу байсан” гэж үзээд Н.Батсуурийг давуулах шийдвэрийг гаргаж, наадамчин олныг гайхшруулав.
Наадамчин олон өндөр даваанд 60 минутын барилдааны дараа нэг нь хасагдана гэдэг харамсалтай гэхчлэн бухимдаж байлаа.
Дээрх, аварга, арслангуудын хувьд 2013, 2014, 2015 оны наадмын барилдаануудад учраа таарч байснаас хойш энэ жил ийнхүү хүч, бяраа үзэж байгаа юм.
