Монгол Улс Илон Маскийн “SpaceX” компанид нам орбитын хиймэл дагуул ашиглан интернэтийн үйлчилгээ үзүүлэх хоёр лиценз олгосон тухай Монгол улсын Засгийн газар мэдэгдлээ. Монголын сая сая интернэт хэрэглэгчид “SpaceX” компанийн хиймэл дагуулын харилцаа холбооны үйлчилгээ болох Starlink-ээр дамжуулан өндөр хурдны интернэттэй болно гэж Засгийн газраас мэдээллээ.
Starlink нь 3500 гаруй хиймэл дагуул бүхий хурдацтай хөгжиж буй өндөр хурдны интернэтийн сүлжээг байгуулсан бөгөөд алслагдсан бүс нутгуудад хүрч үйлчлэх боломжийг бүрдүүлсэн.
Цахим хөгжил, харилцаа холбооны сайд Н.Учрал хэлэхдээ: "Шилэн кабелийн сүлжээ нь Монгол орон даяар өндөр хурдны интернэтийн өргөн хүрээг хамарсан хэдий ч энэ технологи нь алслагдсан нутгуудад оршин суугаа иргэдэд илүү боломжийг олгоно. Өргөн уудам эх орны маань өнцөг булан бүрт ажиллаж, амьдарч буй малчид, тариаланчид, бизнес эрхлэгчид, уурхайчид дэлхий дахинаас мэдээлэл авч, ашиглах боломжтой болно” гэв.
Монгол Улсын Засгийн газар болон “SpaceX” хоорондын албан ёсны хамтын ажиллагаа өнгөрөгч хоёрдугаар сард Барселон хотноо болсон Mobile World Congress-ийн үеэр эхэлсэн юм.
Монгол Улсын Ерөнхий Сайд Л.Оюун-Эрдэнэ өнгөрсөн сард Тесла (TSLA.O) компанийн гүйцэтгэх захирал Илон Масктай цахим уулзалт хийж, цахилгаан хөдөлгүүрт автомашины салбарт хөрөнгө оруулалт хийх, хамтран ажиллах талаар ярилцжээ.
Байгалийн баялаг ихтэй Монгол Улс цахилгаан автомашины нийлүүлэлтийн сүлжээнд чухал материал болох газрын ховор элемент, зэсийн асар их ордуудтай гэж өчигдөр /2023.07.07/ Ройтерс агентлаг онцолсон байна. Мөн Cnbctv18.com болон зарим хэвлэлээр энэ тухай мэдээлэл нийтэлсэн байна.
Elon Musk's SpaceX expands satellite internet service to Mongolia (cnbctv18.com)