ХӨГЖЛИЙН БАНКНЫ ДЭД ЗАХИРАЛ АСАН Б.ЧОЙЖИЛЖАЛБУУД 27,2 САЯ ТӨГРӨГИЙН ХАХУУЛЬ ӨГСӨН АСУУДЛААР ХАМТ ШАЛГАГДАЖ БАЙГАА “МОДУН” ХХК-ИЙН ЗАХИРАЛ Д.БАТБАЯРЫН “LA COLINA” ХОТХОНЫГ ХӨГЖЛИЙН БАНК БОРЛУУЛНА
Хөгжлийн банк чанаргүй, эрсдэл өндөртэй зээлийн эргэн төлөлтийг шүүхийн шийдвэрийн дагуу барьцаа хөрөнгөөр хангуулж байгаа. Улмаар тус банкны мэдэлд бүрэн шилжсэн эхний ээлжийн 18 үл хөдлөх хөрөнгийг зарж борлуулах ажил эхэллээ.
Үүнд, "Модун" ХХК-ийн зээлийн өр төлбөрт авсан “Ла Колина” бичил хорооллын 12 байр багтжээ.
Ингээд Хөгжлийн банкнаас иргэдийг орон сууцжуулах зориулалтаар зээл авсан “Модун” ХХК-ны талаар товч мэдээллийг хүргэе.
“Модун” ХХК нь Хан-Уул дүүргийн 10 дугаар хороо, Спорт цогцолборын урд талд галлерей үйлчилгээний талбайтай, 164 айлын орон сууц барихаар 2018 онд Хөгжлийн банкнаас 5.8 тэрбум төгрөгийн зээл авчээ. Улмаар “Наран-ухаа” буюу “La colina” хотхоныг барьж эхэлсэн байна.
Ийнхүү иргэдийг орон сууцжуулах төслийн хүрээнд Хөгжлийн банкнаас зээл авсан “Модун “ХХК нь зээлээ төлөлгүй Монголбанкны чанаргүй зээлдэгч ангилалд орж, өдгөө “La colina” хотхоны зарим байр Хөгжлийн банкны мэдэлд шилжээд байгаа юм.
-“МОДУН” ХХК-НЫ ЗАХИРАЛ Д.БАТБАЯР ХБ-НЫ ДЭД ЗАХИРАЛ АСАН Б.ЧОЙЖИЛЖАЛБУУД 27,2 САЯ ТӨГРӨГИЙН ХАХУУЛЬ ӨГСӨН ҮҮ-
Тэгвэл “Модун” ХХК-ны захирал Д.Батбаяр нь Хөгжлийн банкнаас дээрх санхүүжилтийг авахын тулд тус банкны дэд захирал асан Б.Чойжилжалбууд хахуул өгсөн байж болзошгүй нөхцөл байдал тогтоогдсон талаар эх сурвалжууд мэдээлсэн. Тодруулбал, “Модун” ХХК-ны захирал Д.Батбаяр нь өөрийн эзэмшлийн “Боролзой” ХХК-иараа дамжуулан Хөгжлийн банкны дэд захирал асан Б.Чойжилжалбууд 27,2 сая төгрөгийн хахууль өгсөн нь мөрдөн байцаалтын явцад ил болсон гэх мэдээлэл байгаа юм.
Өдгөө “Модун” ХХК-ийн ерөнхий захирал Д.Батбаяр мөнгө угаах хэрэгт яллагдагчаар татагдан Хөгжлийн банкны шүүх хуралд шүүгдэж байна.
Сонирхолтой нь тэрбээр Хөгжлийн банкнаас зээл авах үедээ Худалдаа хөгжлийн банкинд 5.8 тэрбумын зээлтэй байжээ. Үүнийгээ хэвийн төлөлттэй, хэвийн ангиллын зээл байсан гэж өөрөө мэдүүлдэг ч Мөрдөн шалгах ажлын явцад Худалдаа хөгжлийн банкны тусгай газрын мэргэжилтэн Ганболд гэгч “Модун ХХК-ийн захирал манай дээр хэвийн бус ангиллын зээлээ хэвийн ангилалд шилжүүлмээр байна. Монголбанканд хандаад өгөөч гээд манай захиралтай уулзсан. Үүний дагуу манайх захирлын хурлаар оруулж шийдвэрлэсэн” гэж мэдүүлсэн байдаг.
Бид дээрх мэдээллийн дэлгэрэнгүйг эргэн хүргэнэ. Мөн Хөгжлийн банкны ажилчдыг борлуулалтын ажилчид болгож хувиргасан барилгуудын мэдээллийг цувралаар хүргэх болно.
