Монгол Улс маш олон сантай. Тэр сангуудаас санхүүжилт авдаг тусдаа байгууллага, хувь хүмүүс байдаг нь олонд ил болоод байгаа энэ үед ЦЭГ цуврал мэдээллийг хүргэж байгаа. Нэг хэсэг нь сангуудаас зээл тусламж, тэтгэлэг, санхүүжилт аваад сурчихсан байхад нэр бүхий сангуудын талаар сонсож дуулаагүй хүмүүс ч байгаа юм.
Энэ удаад Мэргэжлийн боловсрол, сургалтыг дэмжих сан гэгчийн мэдээллийг танилцуулж байна.
2022 онд маш идэвхтэй санхүүжүүлэлтүүдийг олгож эхэлсэн тус сангаас хамгийн өндөр дүнтэй санхүүжилтийг Техник технологийн политехник коллеж авчээ. Тодруулбал, тус коллеж 2019 оноос хойш 293.3 саяас 2.1 тэрбум хүртэлх төгрөг авсан. Энэ нь нийтдээ 4.5 тэрбум болжээ.
Үүний дараа Хүнс, технологийн политехник коллеж 242.9 саяас 1.3 тэрбумын санхүүжилт авснаараа удаалжээ. 2019-2022 он хүртэл авсан нийт санхүүжилт нь 3.2 тэрбум болж байна.
Ингээд Барилга, технологийн политехникийн коллеж, Барилга, технологийн коллеж, Их засаг МСҮТ, МҮИС-н харьяа Универсал Политехник Коллеж зэргээр санхүүжилт авсан сургуулиуд үргэлжилнэ.
Хамгийн сүүлд л гэхэд Монголын хараагүйчүүдийн үндэсний холбооны дэргэдэх МСҮТ 230 сая төгрөгийн санхүүжилт авчээ.