Улаанбаатар хотын Ерөнхий менежерийн тушаалаар 2023 онд зургаан удаагийн бүх нийтийн их цэвэрлэгээ хийх хуваарийг баталсан. Одоогийн байдлаар хоёр дахь их цэвэрлэгээ буюу “Хотоо угаая” аян үргэлжилж байна. Уг аяны хүрээнд аж ахуйн нэгж, байгууллагууд гадна фасадаа угааж, цэвэрлэх ажил өрнөж буй юм.
Цэвэрлэгээний талаарх зарим мэдээллийг Захирагчийн албаны Ахлах мэргэжилтэн Т.Энх-Амгалангаас тодрууллаа.
Тэрбээр ""Хотоо угаая" аяны хүрээнд дүүргүүд болон аж ахуй нэгжүүдийн харьяа байгууллагууд идэвхтэй хамрагдаж байгаа. Дүүргүүд маань байгууллагуудаа уриалж ойр орчмын 50 метрийн зайд байгаа гадна талбайг цэвэрлэхээр хуваарь гарган ажиллаж байна. Нийслэлийн Улаанбаатар хотын Захирагчийн албаны хувьд харьяа газрууд болон хот тохижилтын газар өглөөний 5 цагаас эхлээд авто зам болон нийтийн эзэмшлийн гудамж талбайд чийгтэй цэвэрлэгээ хийж ажиллаж байна.
Мөн захирагчийн албатай хамтран иргэдийн бүлэг ажилладаг байгаа. Хорооны ажилгүй 120 иргэнийг цэвэрлэгээ үйлчилгээнд хамруулж ажилладаг. Энэ хүрээнд дээрх 120 иргэн маань "Хүүхдийн баяр"-ыг угтаад СӨХ-ны хүүхдийн тоглоомын талбайг цэвэрлэдэг.
Жил болгон зохион байгуулдаг зургаан удаагийн бүх нийтийн их цэвэрлэгээнд иргэд, аж ахуй нэгжүүдийг идэвх санаачилгатай оролцоорой хэмээн уриалж байна" гэлээ.
