Хатгааны хүнд хэлбэр үүсгэдэг вирусууд тархаж байна
"Эмнэлгүүд ногоон түвшинд шилжиж, түргэвчилсэн тест шаардахаа болино"ХӨСҮТ-өөс томуу, томуу төст өвчний тархалт, ачаалал, вакцинжуулалт, тууралтат халдвар, салхин цэцгийн эмнэлзүй, ковид-19, хилийн тандалтын А13 тушаалын хэрэгжилтийн талаар мэдээлэл өглөө.
Мэдээлэлд өгүүлснээр Ковид 19 цар тахлын тархалт манай улсад буурсаар ногоон түвшинд дөхөж очжээ. 2022.12.21-нээс хойш уг өвчнөөр хүн нас бараагүй, хэд хонож байж нэг тохиолдол илрэх хэмжээнд хүрсэн учир “Ногоон түвшин”-д шилжих саналаа холбогдох байгууллгуудад хүргүүлсэн байна.
ХӨСҮТ-ээс одоо дэлхийн жишгийн дагуу эмнэлгийн тусламжийнхаа Цар тахлын дараах тогтвортой байдлын төлөвлөгөө боловсруулах ажлын хэсэг гарчээ. Дэлхийн эрүүл мэндийн байгууллагын зөвлөмж ёсоор цаашид ковид 19, томуу, томуу төстийнхөө оношилгоог нэгтгээд хилийн шалган нэвтрүүлэх цэгүүд дээр тандалтаа хийгээд явж байгаа аж. Мөн ногоон түвшинд шилжсэнээр ЭМБ-аар үйлчлүүлэхэд түргэвчилсэн тест авахгүй гэнэ.
Харин томуугийн өвчлөл буураагүй. Эмнэлэгт үзүүлэгсдийн 16, хэвтэн эмчлүүлэгсдийн 35 хүн нь хатгаатай. Томуугаар өвчилсөн хүний 80 хувь нь 15 хүртэлх насны, тэр дотроо 90 хувь нь 4 хүртэлх насны хүүхэд байна.
Хатгалгын хүнд хэлбэрийг үүсгэдэг гурван төрлийн вирус хүн амын дунд тархаж байгаа аж. Томуугаас сэргийлэх хамгийн зөв арга бол вакцинд хамрагдах явдал гэнэ. Түүнчлэн салхин цэцэг өвчнөөр 300 хүн өвчилсөн нь тархалтаараа томуугийн дараа хордугаарт орж байгаа ажээ.