Нийтийн тээврийн жолооч нар цалин болон нийгмийн хангамж, замын маршрут зэрэг асуудлаар Нийслэлийн Иргэдийн Төлөөлөгчдийн Хурал (НИТХ)-ын дарга Ж.Батбаясгаланд хандан шаардлага хүргүүллээ.
Энэ талаар шаардлага хүргүүлсэн иргэд "Энэ сарын 28-нд НИТХ-ын ээлжит бус хурал болно. Уг хурлаар доорх гурван асуудлыг нэн яаралтай баталж өгнө үү гэж шаардлага хүргүүлж байна.
Нийтийн тээвэрт ажилласан жолооч нарын ажлын найман цагийн цалинг бүтнээр нь бодож олгох, нийслэлийн Засаг дарга бөгөөд Улаанбаатар хотын захирагч Х.Нямбаатарын олон нийтийн хэвлэл мэдээллийн хэрэгслээр зарласан жолооч нарын нэг сарын цалинг бүх татвар, шимтгэлийг хасаад 1,000 ам.доллар буюу 3,500,000 төгрөгийг олгох, мөн жолооч нарын тэтгэврийн эрх үүсэх үед нь нэг удаа 24 сарын цалинтай тэнцэх мөнгөн тэтгэмжийг олгож өгөхийг шаардаж байна.
Нийтийн тээврийн салбарт хүний нөөцийн асуудал ярвигтай байгаа. Үүнийг цалин нэмснээр л шийдвэрлэх боломжтой гэж үзэж буй. Одоогоор жолооч нар 1,600,000-1,800,000 төгрөгөөс шимтгэлээ хасуулдаг. Цайны 20 минуттай, амралтын зохицуулалтгүй хүнд нөхцөлд ажилладаг тул жолооч нар өөр хувийн компанид ажиллахыг илүүд үздэг.
Нийтийн тээврийн хуучин маршрутаар явахад ямар нэг асуудал байхгүй. Өмнө нь автобусны хүрэлцээ муу, эвдрэл ихтэй байсан бол одоо шинэчлэгдээд энэ асуудал жигдэрсэн. Автобус хүлээгдэж буй гол шалтгаан бол түгжрэл. Үүнийг шийдэхийн тулд иргэдийг хувийн унаагаараа түгжирч явах уу эсвэл нэгдүгээр эгнээг нь бүрэн чөлөөлж өгөөд нийтийн тээврээр явах уу гэдэг сонголтыг өгөх хэрэгтэй.
Бид уг шаардлагынхаа хариуг гурав хоног хүлээнэ. НИТХ-ын хурлаар бидний асуудлыг шийдэхгүй бол тэмцлийн дараагийн алхам руу орно" гэж ярилаа.
