Хүнс, Хөдөө Аж Ахуй, Хөнгөн Үйлдвэрийн сайдын тушаалаар Жижиг, Дунд Үйлдвэрийг Хөгжүүлэх Сангаас 2024 онд хөнгөлөлттэй зээл олгох салбар, чиглэл энэ долоо хоногт батлагдсан байна.
Үүнтэй холбогдуулан "ЖДҮХС-гаас хөнгөлөлттэй зээл олгох, сонгон шалгаруулах, дамжуулан зээлдүүлэх, эргэн төлүүлэх, хяналт тавих журам"-д нэмэлт өөрчлөлт оруулах талаар Жижиг, дунд үйлдвэрийн газар болон бизнес эрхлэгчдийн хамтарсан хэлэлцүүлэг өнөөдөр боллоо.
Хэлэлцүүлгийн үр дүнд бизнес эрхлэгчдээс санал авч тус сангаас олгох зээлийн журмыг шинэчлэн батлах аж. Энэ жилийн тухайд нийт 20 гаруй салбарт 36 тэрбум хүртэлх төгрөгийн хөнгөлөлттэй зээлийг олгохоор болжээ. Зээлийн хүсэлтийг энэ сарын 24-нөөс хоёрдугаар сарын 24-ний хооронд цахимаар хүлээн авах юм.
ЖДҮХС нь нийт нэг их наяд хүртэл төгрөгийн санхүүжилтийг 8,668 төсөлд олгосон. Үүнээс 7,572 зээлдэгч 879 тэрбум төгрөгийн зээл төлсөн байна. Одоогоор 1,096 зээлдэгч 168 тэрбум төгрөгийн үлдэгдэлтэй байгаа аж.
