“Эмээлт эко аж үйлдвэрийн парк” ХК-ийн гүйцэтгэх захирал Б.Мягмар, “SMART ENERGY PLATFORM” (SEP) нэгдлийн гүйцэтгэх захирал Dong Hoon Hyun нар эко аж үйлдвэрийн паркт хүлэмжийн хийг бууруулах чиглэлээр хамтын ажиллагааны санамж бичигт гарын үсэг зурлаа.
Хамтын ажиллагааны санамж бичиг байгуулах үйл ажиллагаанд Нийслэлийн Засаг даргын эдийн засаг, дэд бүтцийн асуудал хариуцсан нэгдүгээр орлогч П.Сайнзориг, Нийслэлийн бодлогын судалгаа, шинжилгээний төвийн захирал Р.Дагва, “Smart energy platform” нэгдлийн гүйцэтгэх захирал холбогдох удирдлагууд оролцлоо.
Нийслэлийн Засаг даргын эдийн засаг, дэд бүтцийн асуудал хариуцсан нэгдүгээр орлогч П.Сайнзориг энэхүү хамтын ажиллагааг нийслэлийн зүгээс бүх талаар нь дэмжиж ажиллахаа илэрхийллээ.
“SMART ENERGY PLATFORM” нэгдэл компани нь шинэ дэвшилтэт, ухаалаг технологид суурьлан хүлэмжийн хийг багасгах олон улсын төсөл хөтөлбөрүүдийг хэрэгжүүлэгч байгууллга бөгөөд хамтын ажиллагааны санамж бичгийн хүрээнд Эмээлт эко аж үйлдвэрийн паркаас ялгарах хүлэмжийн хийг бууруулах төслүүдийг хамтран хэрэгжүүлнэ.
Хамтын ажиллагааны үр дүнд хүлэмжийн буюу нүүрстөрөгчийн хийг багасгаж бууруулахад хувь нэмрээ оруулж, олон улсын стандартад нийцсэн бараа бүтээгдэхүүн үйлдвэрлэж, экспортод нийлүүлэх боломж бүрдэж олон улсын зах зээлд өрсөлдөх чадварыг нэмэгдүүлнэ.
