"Эрдэнэс Тавантолгой” ХК нь Засгийн газрын 2010 оны 296 дугаар тогтоолыг үндэслэн БНХАУ-ын "Chalco trading Hongkong Co.ltd"-тай 2011 онд байгуулсан "Нүүрс нийлүүлэх, худалдан авах тухай гэрээ байгуулан урьдчилгаа 350 сая ам долларыг авсан байдаг. Тэгвэл эл асуудлаар Сангийн сайд асан С.Баярцогт гэрчээр дуудагдаад байна.
САНГИЙН САЙД АСАН С.БАЯРЦОГТ:
"Намайг яагаад энэ асуудалтай холбогдуулж дуудсаныг ойлгохгүй байна. Сангийн сайд байхад стратегийн ордуудаас орлого төвлөрүүл гэдэг үүргийг УИХ-аас авч байсан. Эдийн засагт үзүүлж байсан нөлөө нь буруу байсан гэж шинжээчид дүгнээд байгаа юм уу? Энэ гэрээг хийхэд Засгийн газар оролцоогүй.
Энд сууж байгаа гурван сайд бол 2008-2012 оны Засгийн газарт ажиллаж байсан сайд нар. Энэ үед Чалкогийн эхний гэрээ 250 сая ам.долларын гурван хувийн хүүтэй байхаар хийгдсэн. 2012 оноос хойш үеийн асуудлуудыг дараагийн ажил хариуцсан хүмүүстэй нь ярих ёстой.
Засгийн газрын 2010 оны 296 дугаар тогтоолын 1.Хүний хөгжил сангийн 2011 оны орлогын эх үүсвэрийг бүрдүүлэх зорилгоор 310.6 тэрбум төгрөгийн эх үүсвэрийг урьдчилгаа төлбөр болон зээл хэлбэрээр бүрдүүлэх арга хэмжээ авахыг Төрийн өмчийн хороо, "Эрдэнэс Монгол" ХХК-д даалгасугай гэж заасан байна.
