Хянан шалгах түр хорооны нотлох баримтыг шинжлэн судлах нээлттэй сонсголын хоёр дахь үе шат. Өнөөдрийн нотлох баримтыг шинжлэн судлах сонсголоор “Эрдэнэс таван толгой” ХК болон "Тавантолгой" ХК-ийн тээврийн үйл ажиллагаа, нүүрсний экспорт; Нүүрс тээврийн "С" зөвшөөрөлтэй холбоотой асуудал; Гааль, хилийн цэргийн албан хаагч нартай холбоотой асуудлаар нотлох баримтыг шинжлэн судалж, шинжээчийн дүгнэлт, хянан шалгагч нарын тайланг сонсож, шаардлагатай бичмэл нотлох баримтуудыг танилцуулж, холбогдох гэрчүүдээс асуулт асууж, хариулт аван, гэрч, шинжээч, хянан шалгагчаас тайлбар авна.
Сонсголд оролцуулахаар дээрх гурван асуудалтай холбогдуулан нийт 128 гэрчийг дуудуулсан байна.
ГЭРЧ Т.ДОРЖХАНД:
Тооцооллыг манай судлаачдын баг, олон улсын түвшинд ажилладаг хүмүүс гаргасан. Өнөөдрийн сонсголын шинжээчид ямар түвшний хүмүүс гэдгийг мэдэхгүй. 40 их наядын үүх түүхийг ярьж өгч болж байна. 2022 оны дөрөвдүгээр сарын 5-нд Ерөнхий сайд Л.Оюун-Эрдэнэ сэтгүүлчдийн өмнө мэдээлэл хийсэн байдаг. Тэрбээр "Төрөөс гадуур их хэмжээний мөнгө эргэлдэж байна. Бүлэглэлийг илрүүлнэ. Далд эдийн засаг сэргэхэд манай улсын ДНБ тэлнэ" гэсэн. Бид эдийн засагчид учир энэ мэдэгдлийг нь судалсан. Тухайн оны арванхоёрдугаар сард нүүрсний асуудал мандаж эхэлсэн. Иргэд тоо нэхсэн. Хариулт хэрэгтэй байсан. Бид суусан. Бид төсөөлөл явуулсан, Г.Ганболд гишүүний яриан дээр үндэслээд энэ тоог гаргасан.
