Нүүрсний хулгайн хэрэгтэй холбоотой нээлттэй сонсгол гурав дахь өдрөө үргэлжилж байна. Тэгвэл нүүрсний хулгайн хэрэгт яллагдагчаар татагдаад байгаа "Эрдэнэс Тавантолгой" ХК-ийн гүйцэтгэх захирал асан Б.Ганхуяг гэрчээр оролцох хүсэлт гаргасан ч оролцуулах боломжгүй хэмээн Хууль зүйн сайд Б.Энхбаяр тайлбарлав.
Мөн энэ үеэр Б.Ганхуягийн төрсөн эгч Б.Нарантуяа "Б.Ганхуягийг хэвийн хэмжээнээс 9200 дахин их хүнцлийн хороор хордож үхэлд хүргэх хэмжээний аюултай байгаа гэдэг лабораторийн эмчийн дүгнэлт гарсан байна" гэж мэдээлсэн. Тэрээр хэлэхдээ “Миний дүүгийн биеэс их хэмжээний хүнцэл илэрсэн гэдгийг мэдсэн. Судалбал хүнд хортой металл гэдэг нь тогтоогдсон. Б.Ганхуягийн биед илэрсэн хүнцлийн хэмжээ 9200 дахин илүү байна гэж шинжилгээ авсан нарийн мэргэжлийн эмч нь дүгнэсэн. Ардчилсан Монгол Улсад хүнийг олон сараар цагдан хориод үг хэлэхийг нь хааж, боочхоод нэмээд хордуулж болох юм уу. Мөн нойр булчирхай болон чөмгөөр нь дамжиж таван цул нь гэмтэх эрсдэл үүссэнээс гадна бөөрний хүнд өвчтэй болох нөхцөл байдал тогтоогдоод байгаа" гэв.
