Дорнод аймгийн Засаг даргын санаачилгаар аймгийн орон нутгийн төсөв, сумын орон нутгийн төсвийн хамтарсан хөрөнгө оруулалтаар Дорнод аймагт анх удаа "Нутгийн ирээдүй" төрийн албан хаагчдын 2 давхар 8 айлын орон сууц Гурванзагал суманд сүндэрлэлээ.
Энэхүү барилга нь жишиг зургаар 37 м2 талбайтай 4 айл, 46 м2 талбайтай 4 айлын орон сууцны барилга. Байрны түлхүүрийг тус суманд гэр бүлээрээ ажиллаж, амьдрахаар шилжин ирсэн шинэ боловсон хүчнүүд гардан авлаа.
Сум, орон нутагт ажиллаж буй мэргэжлийн боловсон хүчин, төрийн албан хаагчид тогтвор суурьшилтай ажиллахад тулгардаг гол асуудал болох тав тухтай амьдрах орон сууцны асуудлыг шийдвэрлэх зорилгоор ийнхүү "Нутгийн ирээдүй" төрийн албан хаагчдын орон сууц төслийг хэрэгжүүлж байна. Ирэх онд 5 суманд, дараагийн онуудад бүх суманд үргэлжлүүлэн хэрэгжүүлэх болно.
