Цагдаагийн байгууллагад бүтцийн өөрчлөлт хийн Кибер гэмт хэрэгтэй тэмцэх хэлтсийг өргөтгөн Кибер гэмт хэрэгтэй тэмцэх газар болгож буй талаар ЦЕГ-ын харъяа Кибер гэмт хэрэгтэй тэмцэх төвийн дарга, дэд хурандаа С.Тайван мэдээлэл өглөө. Тэрбээр мэдээллийн үеэр хэлэхдээ:
“Иргэн цахим залилангийн гэмт хэргийн хохирогч болсны дараа эргээд гэмт хэрэг үйлдсэн хүнийг олж тогтоон эрүүгийн хариуцлага хүлээлгэхэд цаг хугацаа их ордог. Мөн гэмт хэрэг үйлдэн олсон орлогоо үрэн таран хийчихсэн байдаг. Хохирол нөхөн төлүүлэх ямар ч боломжгүй байдаг гэсэн үг. Тэгэхээр бид энэ нөхцөл байдлыг хараад иргэдийг кибер гэмт хэргийн хохирогч болгохгүй байх үүднээс тус төвийг байгуулж байгаа. Энэ бол хамгийн үнэ цэнэтэй иргэд рүүгээ чиглэсэн үйл ажиллагаа юм. Цахим гэмт хэрэг үйлдсэн хүнд 8 хүртэлх жилийн хорих ял оноодог. Хууль тогтоомжийн хүрээнд хариуцлага тооцох боломжтой. Хамгийн гол нь энэ гэмт хэргийг илрүүлэхэд хүндрэлтэй байдаг. Интернэтийн цаанаас гэмт хэргийг үйлдээд байгаа учир олж тогтооход цаг хугацаа их ордог. Тиймээс бид иргэдийнхээ саналыг сонсоод энэ төвийг байгуулан дэлхийн жишигт нийцсэн үйл ажиллагаа явуулах юм” гэлээ.
