МИАТ ТӨХК-ийн гүйцэтгэх захирал Б.Мөнхтамир ирэх 2024 оны УИХ-ын сонгуульд нэр дэвшихээр яригдаж байгаа тул шинэ он гарахаас өмнө ажлаа өгөхөөр төлөвлөжээ.
Харин ирэх 2024 оны УИХ-ын сонгууль Үндсэн хуульд оруулсан өөрчлөлтийн дагуу холимог системээр явагдаж, үр дүнд нь парламентын 126 гишүүнтэй болно. УИХ-ын гишүүдийн тоо нэмэгдэж буйтай холбоотойгоор улс төрийн намууд залуу, боловсролтой боловсон хүчний эрэлд гарсан гэх мэдээлэл бий.
Тухайлбал,МИАТ ТӨХК-ийн гүйцэтгэх захирал Б.Мөнхтамир 2024 оны УИХ-ын сонгуульд нэр дэвшихээр яригдаж эхэлсэн гэх мэдээлэл байна. Тэрбээр МАН-ын дэргэдэх Нийгмийн ардчилал монголын залуучуудын холбоо /НАМЗХ/-ны дэд ерөнхийлөгчийн албан тушаалаас “МИАТ” ТӨХК-ийн Захиргаа, хууль эрх зүй эрхэлсэн дэд захирлаар томилогдож байсан нэгэн. Товчхондоо тэрбээр МАН-ын угшилтай боловсон хүчин. Энэ утгаараа ирэх оны УИХ-ын сонгуульд тус намаас нэр дэвшихээр төлөвлөж байгаа аж. Харин түүний жагсаалтад оруулах уу, тойрогт дэвшүүлэх үү гэдгийг МАН-ын дарга Л.Оюун-Эрдэнэ шийднэ.
Харин УИХ-ын сонгуулийн тухай хуульд төрийн болон орон нутгийн өмчийн оролцоотой хуулийн этгээдийн захирал ээлжит сонгуулийн жилийн нэгдүгээр сарын 01-ний өдрөөс өмнө эрхэлсэн ажил, албан тушаалаасаа чөлөөлөгдсөн байна гэж заасан.
Тодруулбал,УИХ-ын сонгуулийн тухай хуулийн 29.4-д Нэр дэвшигч нь дараах ажил, албан тушаал эрхэлж байгаа бол ээлжит сонгуулийн тухайд ээлжит сонгуулийн жилийн нэгдүгээр сарын 01-ний өдрөөс өмнө, ээлжит бус, нөхөн сонгуулийн тухайд энэ хуульд заасан нэр дэвшүүлэх ажиллагаа эхлэхээс өмнө эрхэлсэн ажил, албан тушаалаасаа чөлөөлөгдсөн байна" гэж заажээ. Тиймээс МИАТ ТӨХК-ийн гүйцэтгэх захирал Б.Мөнхтамир нь хуулийн дагуу шинэ оноос өмнө ажлаа өгөх төлөвлөж байгаа гэдгийг эх сурвалж мэдээллээ.
