Ерөнхий сайдын асан С.Батболдын хүү Б.Баттүшиг энэ пүрэв гаригт буюу өчигдөр Парис хотын Ланди замын ойролцоо дээрэмдүүлсэн тухай мэдээлэл гараад байна. Ингэхдээ, түүнийг эхнэрийн хамт Шарль де Голль нисэх онгоцны буудлаас таксигаар зорчиж явж байхад нь скүүтертэй хоёр этгээд машины хойд цонхыг хагалж, үнэт эдлэл бүхий цүнхийг нь хулгайлсан, хохирлын хэмжээ 600 мянган еврогоор хэмжигдэж буй гэдэг мэдээлэл цацагдаад байгаа юм. Мөн тэднийг Ерөнхийлөгчийн айлчлалтай хамт яваа гэх мэдээлэл цахим орчинд хөвөрчээ.
Тэгвэл тэд Ерөнхийлөгчийн айлчлалын багтай хамт яваагүй. "Парис 2024" олимпын наадамтай холбогдуулж гэрээ хэлцэлд гарын үсэг зурах ажилтай явсан байна.
Бүр тодруулбал, Монголын үндэсний олимпийн хороо (МҮОХ)-ноос Монголын баг тамирчдыг танилцуулах, Монголын соёл, өв уламжлалыг сурталчлах үндсэн зорилготой “Mongolia House” аппликэйшнээ танилцуулж, хамтын ажиллагаанд гарын үсэг зуржээ.
Мөн сошиал орчинд тархаж байгаа шиг 600 мянган еврогийн үнэт эдлэл алдсан зүйл байхгүй, харин бичиг баримт алдсан гэж эх сурвалж мэдээллээ.
