Сангийн сайд Б.Жавхлан 2024 оны төсвийн төслийн онцлох хөрөнгө оруулалтуудын талаар мэдээлэл өглөө.
Тэрбээр "2024 оны төсвийн онцлог нь улсын төсөвт хүндрэл учруулж байсан нөхцлийг арилгахыг зорьсон. Тухайлбал, зураг төсөвгүй хөрөнгө оруулалтын төслүүд ордог байсныг зогсоосон. Шинэ төслүүдийг амсуулаад тавьдаг байсныг бүрэн зогсоосон. Тэгэхээр ирэх жилийн хөрөнгө оруулалтууд маш чанартай, төсвийн нарийн зохицуулалттай болсон.
Мөн ард иргэдийн оролцоог маш сайн хангасан. Ард олон өөрсдөө эрэмбэлж төсөвт оролцдог жишиг тогтоолоо.
Ирэх онд эрүүл мэндийн салбарт олон жил яригдсан 140 тэрбум төгрөгийн төсөвт өртөгтэй Эс, эд, эрхтэн шилжүүлэн суулгах эмнэлгийн ажлыг эхлүүлнэ. 3/1-ээр буюу 40 тэрбумаар нь эхлүүлэх ажил өрнөнө.
Алдагдлын хувьд, төсвийн тусгай шаардлагыг бүрэн хангаж ажиллаж байгаа. 4.4 их наядын алдагдлыг 2.8 болгож буурна гэж тооцоолж байгаа. Төсөв тодорхой хэмжээнд тэлнэ. Энэ жилийн зарлагын өсөлтийг 22.5 хувьтай байлгана. Эрсдлийг бүрэн хангаж ажиллаж байгаа төсөв болж байгаа.
Хүүхэд хамгааллын санг энэ жилийн найман тэрбум төгрөгийн гүйцэтгэлтэй байгаа. Үүнийг ирэх жил 14 тэрбум төгрөгт хүргэнэ. Бусад хүүхдийн зуслан, хүүхэд хамгааллын төвүүдийн урсгал зардлууд дор бүрээ нэмэгдсэн. Төсөв хэлэлцэх хугацаанд хүүхэд хамгаалалтай холбоотой зардал гарвал шийдээд явна.
УИХ 126 гишүүнтэй болж буйтай холбогдуулан Төрийн ордонд ажиллах боломжийг хангах ёстой. Тэр утгаараа Төрийн ордны засвар үйлчилгээг 12 тэрбум төгрөгт багтааж хийнэ. Цахим орчинд яваад байгаа шиг 22.8 тэрбум төгрөг биш. Их танхимаасаа эхлээд, цахим тоног төхөөрөмжүүд хуучирсан учир шинэчлэх шаардлагатай.
Багш мэргэжлээр суралцаж буй хүүхдүүдэд Засгийн газраас тэтгэлэг олгоно. Ойрын хугацаанд хөдөө орон нутагт багш боловсон хүчний дутагдалд орох судалгаа байгаа. Тиймээс багш мэргэжлээр суралцах хүүхдүүдийн ЭЕШ-ын босго оноог өндөр тавьж өгсөн" хэмээн ярив.
