УИХ-ын намрын чуулганы өчигдрийн /2023.10.05/ хуралдаанаар хотын дарга болон сайд нарыг томилсон юм. Чуулганд Ерөнхий сайд оролцож, гишүүдийн асуултад хариулт өгсөн.
ЕРӨНХИЙ САЙД Л.ОЮУН-ЭРДЭНЭ:
Их хотынхоо асуудалд намрын чуулганаа бүхэлд нь зориулчихая. Засгийн газар дээр миний хувьд тусгайлсан тогтоол гаргасан. Засгийн газрын салбар салбарын сайдуудыг зөвхөн нийслэлд анхаар гэж байгаа. Болохгүй байгаа зүйлүүдийг хэдүүлээ сайхан дэлбэлье. Хариуцлага тооцож, цэгцэлж, идээ бээрийг нь шахая.
Тоо худлаа яридаггүй. Өнөөдөр бас боомт сэргэж байна. 74 их наяд руу Монгол Улсын эдийн засаг хүрч, ДНБ 6000 ам.долларт хүрнэ гэдэг бидний мөрөөдөл байсан. Энэ үзүүлэлтэд ирэх жил очих гэж байна. Тэгэхээр Боомтын сайдын бүтэц зөв байсан гэж би харж байгаа.
Б.Дэлгэрсайхан бол автозам, төмөр зам дээр олон жил ажилласан аж ахуйн хүн. Ер нь аж ахуйн хүн байх нь зүйтэй юм билээ. Нуугаад яахав. Би Таван Богд Группийн үүсгэн байгуулагч, Ерөнхийлөгч Ц.Баатарсайханд санал тавьсан. Бизнесийн менежер, төр хувийн хэвшлийн түншлэлээр нийслэлийн асуудлыг хурдасгаад шийдээсэй гэдэг агуулгаар санал тавьсан.
