Биеийн тамир спортын улсын хорооны Анагаах ухааны албаны дарга М.Булган, ЦЕГ-ын Хүч спорт хорооны дасгалжуулагч Э.Мөнхдөл, гавьяат тамирчин Г.Дорж, Үндэсний бөхийн багш дасгалжуулагч Д.Батням нарын гэрээс допингтой ойролцоо, төрөл бүрийн бэлдмэлүүд гарсан талаар бид мэдээлсэн.
Товчхондоо энэ асуудлаас урган гарч буй зүйл бол тэд бөхчүүдэд нууцаар допинг зардаг байсан уу гэдэг асуудал.
Мөн Допингийн эсрэг үндэсний төвийн тэргүүн Ж.Хатанбаатарыг АТГ-аас хэд хэдэн ноцтой асуудлаар шалгаж эхэлсэн. Тодруулбал, түүнийг допингийн шинжилгээний хариуг хувийн цахим хаягаараа авдаг байсан. Тэр бүү хэл допингтой бөхчүүдээс авлигал авч шинжилгээний хариуг нуун дарагдуулдаг байсан байж болзошгүй гэх хоёр шалтгаанаар шалгаж байгаа гэдгийг эх сурвалжууд онцлоод буй.
Ж.Хатанбаатар нь олон жил Допингийн үндэсний төвийн тэргүүнээр ажиллаж байгаа бөгөөд сүүлийн жилүүдэд үндэсний бөхийн хүрээнийхний дунд түүнийг бөхчүүдээс мөнгө авдаг байсан гэх яриа ч дэгдээд байсан юм.
Энэ бүх асуудал Үндэсний их баяр наадмын түрүү бөх М.Бадарчаас допинг илэрсэн асуудлаас үүдэн хүчээ авч байгаа ч өмнө нь байсаар байсан асуудал гэж олон нийт хардаж байна.
М.Бадарчийн асуудал хурцаар тавигдаад эхэлмэгц хууль хяналтын байгууллага мөрөөр нь орж ажилласны үндсэн дээр нууц зүйлүүд ил болж байгаа нь өнөөдөр. Гэвч хэзээнээс ингэж угжиртлаа явсныг илрүүлэх цаг тун ойрхон байна.
Тэд хадгалж, зарж борлуулж байсан нь үнэн бол хэнд, хэзээ, ямар учраас зарж борлуулсан нь ч удахгүй илрээд гараад ирэх биз. Тэгэхээр эдгээр өдрүүдэд ганц улстөрийнхөн биш бөхчүүд, спортынхон ч битүүхэн шуугиантай өнгөрсөн гэсэн үг.
