Нийслэлийн иргэдийн Төлөөлөгчдийн хурлын Мягмар гаригийн ээлжит бус XIV дүгээр хуралдаанаар Сэлбэ, Дунд голын хамгаалалтын бүсийн 534 га талбай бүхий газрыг “Байгалийн нөөц” газрын ангиллаар орон нутгийн тусгай хэрэгцээнд авах тухай тогтоолын төслийг баталсан байна. Ингэснээр хамгаалалтын бүсэд газар эзэмших, барилга барих зэрэг үйл ажиллагаа явуулахыг хоригложээ. Тодруулбал, тусгай хэрэгцээнд авсан тус бүсэд иргэн, хуулийн этгээдэд шинээр газар эзэмших, ашиглах эрх олгох, барилга, байгууламж барих, төлөвлөх, гол, мөрний үндсэн голдирлыг өөрчлөх, усыг үйлдвэрлэлийн зориулалтаар ашиглах, дур мэдэн цооног, худаг гаргах боломжгүй болж байна.
Мөн Сэлбэ, Дунд голын бүсэд стандартын шаардлагад нийцээгүй бүх төрлийн нүхэн жорлон, угаадасны нүх ашиглах, холбогдох байгууллагын зөвшөөрөлгүйгээр гол, голын зурваст хөндлөн гарах инженерийн шугам сүлжээ болон дэд бүтэц, гүүрэн байгууламж хийх, ашиглагч байгууллагын зөвшөөрөлгүйгээр болон усны химийн шинжилгээний итгэмжлэгдсэн лабораторийн шинжилгээний дүгнэлтгүй ус шавхалт хийхийг хязгаарлажээ.
