Онцгой анхаарал татсан буюу 8-аас дээш жил үргэлжилж, хэд хэдэн удаа үнийн хүсэлт төсөвт суугдсан өнөөдрийг хүртэл дуусаагүй буй 25 төсөл арга хэмжээ байна. Эдгээрийг яаралтай дуусгах үүрэг бүхий Шадар сайд С.Амарсайханаар ахлуулсан ажлын хэсэг байгуулагдаж, 7 хоногийн хугацаатай ажиллахаар боллоо. Энэ талаар Сангийн сайд Б.Жавхлан мэдээлэл өгөв.
Тэрбээр "Эдгээрийн дотор голдуу спорт заал, цогцолборын барилгууд байна. Үүнд захиалагч талын буруу их. Тухайлбал анхны гаргасан зураг төсөл нь хэд хэдэн удаа өөрчлөгдөж, төсөв нь өөрчлөгдөхөөр гүйцэтгэгч талаас ажил явуулах боломжгүй болсон.
14 дэх жилдээ хэрэгжээгүй төсөл ч байна. Энэ хооронд барилга нь элэгдэлд орсон, захиалагч талаас гурван удаа төсөв нь өөрчлөгдсөн төслүүд байх жишээтэй. Үүнийг өнөөдөр байгуулагдсан ажлын хэсэг нягтална.
Удаан жил үргэлжилж байгаа төслүүдийг нэгэнт эхлүүлсэн учир зориулалтынх нь дагуу хурдан хугацаанд дуусгах арга хэмжээг авах хэрэгтэй. Эдгээр барилга дотор сургуулийн барилга цөөн байна" гэв.
