УИХ-ын дарга Г.Занданшатар чуулганы нэгдсэн хуралдаанаар хэлэлцэгдэж буй хуулиудын талаар сэтгүүлчдэд мэдээлэл өглөө. Энэ үеэр түүнээс хэд, хэдэн асуудлаар тодруулга авсан юм.
-Гадаадын хөрөнгө оруулалттай ААН-д 100 жилээр газар ашиглуулахтай холбоотой төслийг хэрхэхээр болсон бэ?
-УИХ-ын даргын дэргэдэх зөвлөлөөр 7 хоногт хэлэлцэх асуудлын тов, дараалал, жагсаалтыг баталдаг. Жагсаалтад албан ёсоор энэхүү хуулийн төсөл орж ирээгүй учраас чуулганы нэгдсэн хуралдаанаар хэлэлцэхгүй. Түүнээс гадна Хөрөнгө оруулалтын тухай хуулийн өөрчлөлтөд иргэд хийгээд нийгмийн зүгээс ихээхэн шүүмжлэл дагуулж байгаа. Тиймээс хууль санаачлагч Засгийн газарт буцааж, улмаар Газрын тухай хуулийн төслөөр холбогдох байгууллага, иргэдийн дунд хэлэлцүүлэг зохион байгуулах, эрдэмтэн, судлаачдын санал бодлыг сонсож, дахин боловсруулах ёстой гэсэн чиглэл баримталж байна. Иргэний нийгмийн байгууллагууд олон нийтийн санал шүүмжлэлийг авах ёстой учраас хойшлуулсан байгаа.
-Хөрөнгө оруулалтын хуулийн төсөлд 60 дээр нэмэх нь 40 буюу 100 жилээр газар эзэмшүүлэх заалт байгаа юм уу, та өөрөө анзаарсан уу?
-Хөрөнгө оруулалтын хуулийн төслийг яаралтай хэлэлцүүлэх тухай асуудал бол яригдсан. Хөрөнгө оруулалтын хуулийн төслийг дагалдаад Газрын тухай хуулийн төсөлд газрыг 60 жилээр ашиглуулахаас гадна 40 жилээр сунгаж болох заалт байсан. Энэ асуудлыг Газрын багц хуультай нийцүүлэн цогц реформтой уялдуулж шийдэх ёстой гэсэн УИХын Хууль зүйн байнгын хорооны санал дүгнэлт гарсан учраас хэлэлцэхгүй гэж шийдвэрлэсэн.
-Газрыг 60 дээр нэмэх нь 40 гэсэн байдлаар эзэмшүүлнэ гэсэн заалтыг буцаасан ч дахин орж ирэхгүй гэсэн үг биш биз дээ?
-УИХ-ын Хууль зүйн байнгын хорооны зүгээс хэлэлцэх боломжгүй гэж шийдвэрлэсэн байгаа. Ер нь УИХ асуудлын нүүдэл шийдлийг нь олох ёстой. Гадна, дотны хөрөнгө оруулалтыг татах, эдийн засгийн чөлөөт бүсийг байгуулах зэрэг хөрөнгө оруулалтыг дэмжих агуулгаар зохицуулалт хийх болно. Гэхдээ ийм хэлбэрээр оруулж болохгүй гэж үзсэн учраас буцаасан. УИХын Хууль зүйн байнгын хорооноос мөн Үндсэн хуулийн шаардлагатай нийцэхгүй хэмээн хууль зүйн дүгнэлт гаргуулахаар саналаа ирүүлсэн. Энэ дагуу шийдвэрлэнэ.
