Канад улсын хууль тогтоогчид амьд амьтан дээр гоо сайхны туршилт хийх нь амьтны эрхийг ноцтой зөрчиж байгаа тул хориглох шийдвэр гаргажээ. Канадын Засгийн газар гоо сайхны бүтээгдэхүүнийг амьтан дээр турших, амьтны шинжилгээний мэдээлэлд тулгуурласан бүтээгдэхүүн борлуулахыг өнгөрсөн долоо хоногт баталсан хуулийн дагуу хориглосон байна.
Амьтны эрхийг хамгаалах нийгэмлэгээс мэдээлснээр нийт 44 улс орон амьтад дээр гоо сайхны туршилт явуулахыг хориглосон хууль баталжээ. Мөн эдгээр улс орноос гадна АНУ-ын Нью-Йорк, Виржиниа, Калифорниа, зэрэг 10 мужид ч энэхүү үйл ажиллагааг хориглосон байдаг байна.
Канадын Эрүүл мэндийн сайд Жан-Ив Дуклос "Одоо болон ирээдүйд амьтдыг хамгаалах нь олон сая Канадчуудын уриалж байсан зүйл бөгөөд бид бүгдээрээ энэ өдрийг марталгүй, цаашид ч онцлон тэмдэглэж байя. Хамгийн чухал нь энэ нь Канадчууд худалдаж авсан бараа бүтээгдэхүүн нь амьтан дээр туршиж харгислал үйлдэгдээгүй гэдгээр үргэлж бахархах явдал юм.” хэмээн мэдэгджээ. Канадын хууль тогтоогчид амьтад дээр туршилт явуулахыг хориглохоос гадна амьтанд гоо сайхны шинжилгээ хийхийг мөн хориглосон байна. Олон улсын амьтны аюулгүй байдлын үнэлгээний байгууллагаас мэдээлснээр гоо сайхны шинжилгээ гэдэг нь амьтад дээр гоо сайхны бүтээгдэхүүн түрхэх, амьсгалуулах, нүд сормуусанд нь бүтээгдэхүүн түрхэж шинжлэх зэрэг үйл явцууд багтдаг бөгөөд энэ нь урт хугацаанд үргэлжилдэг үйл явц юм.
