УИХ-ын чуулганы нэгдсэн хуралдаан эхэллээ. Өнөөдрийн Нийгмийн даатгалын тухай багц хуулийн төсөл болон хамт өргөн мэдүүлсэн хууль, тогтоолын төслийн эцсийн хэлэлцүүлгийг хийхээр товложээ. Яг одоо бол Төмөр замын тээврийн тухай хуулийг хэлэлцэж эхэллээ.
Дөнгөж сая УИХ-ын гишүүн Н.Алтанхуяг хэлэлцэж байгаа асуудалтай холбоотой үг хэллээ.
Тэрбээр “Намууд өмч хөрөнгөтэй байгаа нь улс орны ялзрал юм. Сая Үндсэн хуулиа баталчихаж. Гишүүдээ тоог ч нэмчихэжээ. МАН, АН-ын хэдэн хүн нийлж байгаад жижиг 76 болгож, Монгол Улсыг хорлон сүйтгэсэн удаа бий. Одоо 78 чинь том тойргоос гарах ёстой шүү. Улс орноо боддог л юм бол энийг хийгээрэй.
Юмны үнэ өсч, ард түмний амьдрал хэцүүдчихлээ. Жаахан суурьтай юм хийхгүй юм уу. Ингэсээр байтал бид нарын дөрвөн жилийн бүрэн эрх дууслаа. Бид нарын баталж байгаа хууль ч яахав. Тэр хуулийг хийж, хэрэгжүүлдэг нөхдүүд чинь хуульгүй амьдарч байна.
Хууль алагчилж үйлчилж байна. АН-ын гишүүдэд хатуу байна. Ардуудад бүр хатуу байна. Хулгайч дээрэмчдийг бий болгохгүй байх нөхцлийг УИХ хууль журмаараа хийх ёстой. 40 минут өнгөрчихөөд байхад УИХ-ын чуулган чинь эхлэхгүй байна. Яагаад ингэж суларч, юу болчихоод байгаа юм. Удахгүй наадам гээд айраг, цагаа гээд алга болчихно. Юмнуудаа шуурхай ярилцмаар байна. Гэхдээ Улстөрийн намын тухай хуулинд санаа зовоод байна шүү. Хоёр сар дуугаа хориулсан болохоор ард түмнийхээ ахуй амьдралд анхаар гэж заавал хэлмээр байна” гэв.
