Үндэсний их баяр наадмын нээлт, хаалтын урлагийн тоглолтыг “Скин” интертайнментын хамт олон хариуцан, хийхээр болсон бөгөөд бэлтгэл ажил үргэлжилж байна.
Ерөнхий найруулагчаар ажиллаж байгаа Б.Анарын хувьд 2014 онд "Зүрх зогсохгүй" киноны найруулагчаар ажиллаж байсан. Тэрбээр "Эв мөнхийн тусгаар Монгол” уриатайгаар зохиомжилж буй тус тоголтонд тайзны үзүүлбэрийг технологийн дэвшлийг ашиглан дэлгэцийнхтэй хослуулан, үзэгч олонд шинэлэг байдлаар харуулахаар болжээ.
Нээлт, хаалтын урлагийн тоглолтын эхний нэгдсэн бэлтгэлийг өчигдөр эхлүүлсэн бөгөөд мэргэжлийн урлагийн театр, чөлөөт уран бүтээлчид гээд 1200 гаруй уран бүтээлч оролцож байна. Ер нь жил жилийн наадмын нээлт, хаалтыг хийх найруулагчийг өрсөлдөөнтэй сонгодог. 2022 оны хувьд УДЭТ-ын ерөнхий найруулагч Н.Наранбаатар, "Фантастик" продакшны найруулагч Б.Тамир нар 19 найруулагчаас тунаж үлдэн Үндэсний баярын нээлт, хаалтыг амжилттай зохион байгуулсан. Харин энэ жилийн хувьд нэг найруулагчийн ажиллагааг илүү харахыг зорьсон бололтой.
