УИХ-ын чуулганаар УИХ-ын гишүүн Ж.Бат-Эрдэнэ мэдээлэл хийлээ.
Тэрбээр, "МАН, АН гэж ээлжилж, хамтарч ч явлаа. Энэ 31 жилийн хугацаанд өөрчлөгдсөн зүйлгүй байна. Өнгөрсөн 2022 оны сүүлээр, 10, 11 дүгээр сард жагсаал цуглаанууд болсон. Бас цөөнгүй асуудлууд орж ирсэн. Нүүрстэй холбоотой асуудлууд, Хөгжлийн банктай холбоотой асуудлууд байна. Өнөөдөр ч энэ асуудал дуусаагүй явж байгаа. Энэ болгон дээр ард түмний дургүйцэл, эгдүүцэл хүрээд байна. Тийм ч болохоор жагсаал, цуглаанууд гарч ирж байна. Жагсаал, цуглаан хийж байгаа залуучуудтай уулзаж үзсэн. Юу хүсээд байна вэ гэхээр шударга ёсыг л хүсэж байна.
Энэ саарал байшинд сууж байгаа 76 гишүүний үнэлгээ үнэндээ унасан. Ёстой газар унана гэдэг болсон. Энэ юунаас шалтгаалаад байна вэ гэхээр бидний тогтолцоонд байгаа шүү. Ямар ч хүн намын босгыг алхаад орж ирсэн, буцаад муу муухай зүйл рүү холбогддог нөхцөл байдал руу бид орчхоод байгаа. Тиймээс энэ тогтолцоог өөрчлөх шаардлагатай" гэв.
