УИХ-ын чуулганы хуралдааны үеэр УИХ-ын гишүүн С.Ганбаатар мэдээлэл хийв.
Тэрбээр "Үндсэн хуульд нэмэлт өөрчлөлт оруулах тухай журамд УИХ төслийг хэлэлцээд тухайн нэмэлт өөрчлөлтийг ард нийтийн санал асуулгад оруулах нь зүйтэй гэж УИХ-ын нийт гишүүний гуравны хоёроос доошгүй саналаар тогтвол УИХ тогтоол гаргана гэж заасан.
Бид Үндсэн хуульд нэмэлт өөрчлөлт оруулахдаа зүгээр л хаалгаа хааж байгаад шийдчихдэггүй. Ард нийтийн санал асуулгаар асуух ёстой гэж журамлаж заасан байна. Би өнөөдөр 152 юу, 126 юу, тэр тухай ярих гээгүй байна. Монголын ард түмнээс үүнийг асуугаач. Бид хаалгаа хааж байгаад сандал ширээгээ нэмэх тухай ярьж болохгүй.
76 бол иргэдэд зориулж хууль баталдаг. Бидэнд баталдаг хуулийг ард түмнийхээ өмнөөс бид гар дүрж оролцох гэж байгаа гэсэн үг.
Олон улсын сэтгэгчид бас хэлсэн байна. Айн Рэнд “Зөвшилцөл бол фашизм юм” гэж айхавтар хатуу үг хэлсэн. Судлаад үзвэл шударга ёсонд тулгуурлаагүй зөвхөн улс төрчид хоорондоо ашиг сонирхлоороо зөвшилцвөл фашизм юм. Бүр нарийвчилбал иргэдтэйгээ зөвшилцөхгүйгээр улс төрчид хаалгаа хааж байгаад зөвшилцвөл төрийн эрхэд хүрэх фашизм буюу төрийн эрх мэдэлд сонгуульгүйгээр хүрч байна гэсэн санаа. Эрхэм гишүүд ээ, та бүхнийхээ гэгээн оюун ухаанд санал асууж өгөөч гэж хүсэж байна" гэлээ.
