Үе үеийн Засаг дарга нарын газар олгосон байдал, нийслэл төдийгүй орон нутагт, хэн, аль аж ахуй нэгж хичнээн га талбайг ямар зориулалтаар ашигладаг зэрэг мэдээлэл нээлттэй боллоо.
Тухайлбал, Нийслэлд хамгийн их талбай эзэмшдэг газруудын нэг бол Эмээлт эко аж үйлдвэрийн парк. 2022 онд буюу өнгөрсөн жил Нийслэлийн Засаг дарга Д.Сумъяабазарын захирамжаар газар олгосон. Үйлдвэрийн парк барих зориулалттай нийт 5.398 га талбай бүхий газартай. Мөн амины орон сууцны зориулалттай 481.309 га талбайг олгожээ.
Яагаад амины орон сууцны зориулалттай газар авсан талаар бид тодруулга мэдээллийг авахаар тус “Эмээлт эко аж үйлдвэрийн парк” НӨААТҮГ-ын захирал, НИТХ-ын төлөөлөгч Б.Мягмартай холбодлоо.
Тэрбээр “Дагуул хотын төлөвлөлтийн дагуу аж үйлдвэрийн паркийн ажилчдын орон сууцыг төлөвлөж буюу ирээдүйд барьж байгуулах зориулалттай газрыг эзэмшүүлсэн байгаа. Хотын төлөвлөлтийг томоор, цогцоор нь хийж байгаагийн тод жишээ. Аж үйлдвэрийн паркийн ажилчдын орон сууц тухайн газар, талбайд баригдана гэж ойлгож болно” гэв.
