"Ажнай" Д.Бат-Эрдэнэ нарт "Таван толгой"-н хувьцаагаа луйвардуулсан иргэд мэдээлэл хийж байна.
"Их говийн хөгжил" ТББ-ын тэргүүн Н.Сугар: “Таван Толгой ХК-ийн 51 хувийг Өмнөговь аймгийн иргэд, иргэдийн төлөөлөгчдийн хурал эзэмшдэг. Харин 49 хувийг өмч хувьчлалын цэнхэр эрхийн бичгээр бусдад хувьчлагдсан юм. Одоогоор 20 хувийг Ажнай Инвест компани, Ээрмэл шандас компани 10 хувийг эзэмшдэг. Ажнай Инвест компанийн эзэн нь Д.Бат-Эрдэнэ гэдэг хүн бий. 2022 оны тайлангаар "Таван Толгой ХК" 150 тэрбум төгрөгийн ашиг олсон байна. Тухайн жилдээ нүүрсний борлуулалт сайн байгаа үед хувьцаа эзэмшигчдэдээ олгодог ногдол ашиг их байдаг.
1995-2008 онуудад иргэд Ажнай Инвест брокерын компаниар дамжуулж цэнхэр эрхийн бичгээр хувьцаа эзэмшиж байсан. Гэтэл уг компаниар дамжин иргэдийн эзэмшиж байсан хувьцаа алга болсон. Тухайн үед иргэдэд хэлэлгүй хуурамчаар гүйлгээ хийж Д.Бат-Эрдэнийн данс руу иргэдийн хувьцаа шилжиж орсон байдаг.
Мөн Санхүүгийн зохицуулах хороонд хандан шалгалт явуулахад хууль бусаар зарцуулсан байна хэмээн тогтоосон. Тухайн үед гомдол гаргасан 23 иргэний өмчлөх эрхийг сэргээсэн байдаг. Гэтэл Дээд шүүхээс хувьцаа эзэмшигчдийн талд гарсан шийдвэрийг анхан шатны шүүх рүү шилжүүлсэн. Тухайн хэргийн мөрдөгч, прокурорууд илтэд байгаа баримтыг санаатайгаар орхигдуулсан байж болзошгүй гэж хардаж байна" гэлээ.
