Ж.ГАНБАТ: Хамгийн хямд үнийн санал өгсөн компаниудыг нүүрс тээвэрт явуулж байгаа

"Эрдэнэс Тавантолгой" ХК-ийн БЭТ Ж.Ганбат томилогдсон хугацаанд тус компанид гарсан өөрчлөлт болон бусад цаг үеийн асуудлаар тодруулга мэдээлэл өглөө. Тэрбээр “Онцгой дэглэмийн хугацаанд 13.0 сая тн нүүрс борлуулан, 4.3 их наяд төгрөгийн орлого олж, төсөвт 1.5 их наяд төгрөгийн татвар төлсөн” гэдгийг онцоллоо. Үргэлжлүүлэн, өмнө нь өдөрт тогтмол 200-300 машин нүүрс тээвэрлэдэг байсан. Өдгөө тогтмол 800-1100 гаруй тээврийн хэрэгсэл гарч байгаа. Аль болох дотоодын тээврийн компаниудыг нүүрс тээвэрт явуулж байна. Хамгийн хямд үнийн санал өгсөн тээврийн компаниудаар нүүрсээ зөөлгөөд явж байгаа гэсэн үг. Монгол Улсад нийтдээ нүүрс тээврийн зориулалттай 22 мянган хүнд даацын автомашин байна гэсэн судалгаа байгаа. Үүнийг бүрэн “Эрдэнэс Тавантолгой”-н тээвэрт ашиглах боломжгүй. Тийм учраас сонгон шалгаруулалт тендер зарлаж байгаа. Нөгөө талдаа хилээр гарахад С зөвшөөрлийн асуудал тулгардаг. Сая бид II дугаар улирлын С зөвшөөрлийг олгосон. Гэтэл 13 мянга орчим хүсэлт ирж байгаа юм. Харин бидний олгох хязгаар нь 4680 шүү дээ.