Хаягаа алдахдаа хүртэл улстөржүүлдэг “Монгол ёс”

Бага зэрэг олонд танигдаад ирэхээрээ л миний хаягруу хэн нэгэн нэвтрэхийг завдлаа, хакердлаа, бараг л Засгийн газар, хууль хяналтынхан миний эсрэг ажиллагаа явуулж байна гэх хүмүүс олон. Гэхдээ хаягаа алдах, орж чадахгүй болох, элдэв хориг тавиулахдаа хүртэл улстөржүүлээд байвал энэ нийгэмд улстөргүй юм үлдэхээ болих нь. Саяхан сэтгүүлч Ч.Лодойсамбуу youtube сувгаа алдсан гэж баахан “дэвж”. Ганц Ч.Лодойсамбуу ч биш ер нь л ажиглаад байхад манай улсад нь хаягаа алдчихлаа, хаагчдихлаа, хэн нэгний захиалга гэж өвчигнөх байдал газар авч байна. Олон улсын алдар цуутай хүмүүс хүртэл цахим хаягтаа нэвтэрч чадахгүй болчихлоо, хаалгачихлаа гэх тохиолдлууд гарч өөрчилж, шинэчилж л байдаг. Арай ч монголчууд шиг ингэж улстөржүүлж, өөрийгөө дөвийлгөж тоглолт хийдэггүй байх аа.Энэ дашрамд иргэддээ хандаж сэрэмжлүүлэг мэдээлэл хүргэхэд, Иргэн та цахим хаяг, цахим хуудсаа бусдад алдсан тохиолдолд Эрүүгийн цагдаагийн албаны Кибер гэмт хэрэгтэй тэмцэх хэлтэст бичгээр  өргөдөл гомдлоо гаргаж шалгуулахыг зөвлөж байна. Тус хэлтэс нь Монгол Улсын Эрүүгийн хуулийн 26 дугаар бүлэгт заасан “Цахим мэдээллийн аюулгүй байдлын эсрэг” гэмт хэргүүдэд, өөрөөр хэлбэл, “Цахим мэдээлэлд хууль бусаар халдах”, “цахим мэдээллийн сүлжээнд хууль бусаар халдах программ, техник хэрэгсэл бэлтгэх, борлуулах”, “хор хөнөөлт программ хангамж бүтээх, ашиглах, тараах” гэх мэт хэрэгт мөрдөн шалгах ажиллагаа явуулдаг билээ.