Shilen.gov.mn-д Хөдөө аж ахуйг дэмжих сангаас зээл авсан 6,092 ААН, ТББ, иргэний эргэн төлөгдөөгүй 52.4 тэрбум төгрөгийн зээлийн үлдэгдлийн талаарх мэдээллийг нээлттэй байршууллаа. Энэ нь үе, үеийн сайд нарын олгосон зээл юм. Мөн төрийн өмчит болон төрийн өмчийн оролцоотой 71 байгууллагын
ТУЗ-ийн мэдээллийг ил болгосон юм.
Хөдөө аж ахуйг дэмжих сангаас “Арованна” ХХК хамгийн их буюу 4 тэрбум 551 сая 165 мянган төгрөгийн зээл авсан ч буцаан төлөөгүй байна.Эл компанийн тухайд Б.Батзоригийг ХХААХҮЯ-ны сайдаар ажиллаж байхад “Мал хамгаалах сан”-аар дамжуулан ОХУ-аас хямд тэжээл оруулж ирэхээр 40 тэрбум төгрөг 27 компанид тараасан асуудалд нэр холбогдсон байдаг.
Товчхондоо, дээрх мөнгөнөөс илүү гарсан 30 тэрбумаас “Милл хаус” (2.0), “Од групп” (3.0), “Арованна” (5.0), “ЧТМО” (2.0), “Чансаа Ханхөхий холдинг” (3.0), “Хөвсгөл Алтандуулга” (5.0), “Жи Өү Ти Ти” (2.0) компаниудын авсан зээл нийлээд 17 тэрбум төгрөг болжээ.
Эдгээр долоон компани авсан мөнгөнийхөө 60 хувиас бага дүнтэй тэжээл оруулж ирснийг гаалийн (2017.12.01-2018.07.31 хооронд) импортын мэдээнээс харж болно.
“Арованна” компанитай холбоотой хайлтыг хийвээс 2009 онд байгуулагдсан. 2014 оноос Дүгэржавын Ганзориг хувьцаа эзэмшигчээр бүртгүүлсэн гэдэг мэдээлэл байна.Мөн тус компани нь мах махан бүтээгдэхүүний үйлдвэрлэл худалдаа, бизнесийн зөвлөгөө, гадаад худалдаа, аялал жуулчлал, бууз баншны үйлдвэрлэл, малын нэмэлт тэжээлийн үйлдвэрлэлийн чиглэлээр үйл ажиллагаа явуулдаг байна. Д.Ганзоригийн хувьд Арованнатай ижил төстэй үйл ажиллагаа эрхэлдэг Алимантөгс буян, Намрын буудай зэрэг компаниудтай.
Харин албан бус эх сурвалжийн мэдээллээр Д.Ганзориг нь УИХ-ын гишүүн Ш.Раднаасэдийн аавын талынх нь ойрын хамаатан гэх.
