С.ОДОНТУЯА: Эрэгтэй улстөрчид яаж мөнгө хулгайлахаа тооцоолсон байдаг

Шинээр томилогдсон хоёр сайд УИХ-д тангараг өргөх гэж байна. Х.Булгантуяаг Хөдөлмөр, нийгмийн хамгааллын, Б.Тулгыг Боомт хариуцсан сайдаар томилох захирамжийг Ерөнхий сайд танилцуулав. Мөн шинэ сайдуудаас гишүүд асуулт асууж, үг хэллээ. Энэ үеэр УИХ-ын гишүүн С.Одонтуяа  ХНХ-ын сайд Х.Булгантуяад хандаж "Тэтгэврийг долоо биш таван жилийн дунджаар тооцож, тогтоодог болох асуудлыг ярьж байгаа. Та энэ асуудлыг дэмжээрэй. Хамгийн их хохирдог нь эмэгтэйчүүд байдаг. Сангийн яаманд ажиллаж байсан учраас яаж мөнгө хэмнэх вэ гэдгийг бодох байх. Гэхдээ хүүхдүүд, ээжүүдээс мөнгө битгий харамлаарай. Эрэгтэй улстөрчид яаж мөнгө хулгай хийх вэ гэдгийг тооцоолсон байдаг. Мөнгө бол байгаа. Тусламж хэрэгтэй байгаа хүмүүсээ зоригтой хамгаалж, ажиллаарай гэж хүсэж байна" гэв. Харин Ерөнхий сайд Л.Оюун-Эрдэнэ "Хулгай, эдийн засгийн өсөлт хоёр нэг зүйл болоод байна. Д.Бат-Эрдэнэ рүү дайраад яах вэ, Т.Бадамжунайг барьж хориод яах гэсэн юм бэ гэдэг зүйл сүүлийн хэд хоног яригдлаа. Ийм зүйлд битгий итгээрэй гэж иргэдэд уриалмаар байна. Авлига авсан хүмүүс биднийг өрөвдөөгүй. Өрөвдөж, уучилж болохгүй. Бидний ирээдүйг хулгайлсан. Энэ асуудал дээр улс төржиж болно. Гэхдээ улс төрийн ямар шийдвэр гарч, хөшигний ард юу болж байгааг Монголын ард түмэн бүгд мэдэж байгаа. Миний хувьд ухрахгүй. Бид авлигаас салах ёстой. Хачигтай мал хүндэрчихдэг шиг салбар бүхэн дээр шимэгчилж амьдарсан улс төр, шүүхийг худалдаж авсан нөхөдтэй бид нам харгалзахгүй тэмцэнэ” гэв.