Г.ЭРДЭНЭБИЛЭГ: Ар гэрийнхнээс нь зөвшөөрөлгүй авалгүй охинд минь задлан шинжилгээ хийсэн

Баянгол дүүргийн нэгдсэн эмнэлэг гурван настай охинд буруу эмчилгээ хийснээс болж амиа алдсан талаар охины аав Г.Эрдэнэбилэг өнөөдөр /2023.04.07/ мэдээлэл хийлээ. Тэрбээр “Өнгөрсөн нэгдүгээр сарын 7-нд Баянгол дүүргийн эмнэлэгт хэвтэж, найм хоног эмчлүүлж байсан охинд минь буруу эмчилгээ хийсний улмаас харамсалтайгаар нас барсан. Уушгины хатгалгаа биш гэдэсний ханиад гээд буруу эмчилгээ хийсэн. Миний хувьд Баянгол дүүргийн эмнэлгийн эмч нарт маш гомдолтой байна. Тухайн үед эмч нарт хүүхдийн бие хавантай, муу байна гэдгийг удаа дараа хэлж байсан. Гэтэл эмч нар мэдэж байгаа, эмчилгээ хийж байна шүү дээ л гэдэг хариу өгсөн. Нэгдүгээр сарын 14-нд дүүргийн нэгдсэн эмнэлгийн эмч нар хуралдаж, ярилцаад явсан. Охины маань бие тэр шөнө сайжраагүй. Улмаар маргааш нь хүүхдэд антибиотик хийх боломжгүй талаар эмч хэлсэн. Тэгээд 15-ны өдөр амилуулах эмчилгээ хийж чадалгүйгээр охиноо бид алдсан. Маргааш нь буюу нэгдүгээр сарын 16-ны өдөр охинд минь ар гэрийнхнээс нь зөвшөөрөл авалгүй задлан шинжилгээ хийсэн байсан. Тиймээс бидний зүгээс цагдаагийн байгууллагад хандаж гомдол гаргасан” гэв.