Б.ЭНХБАЯР: Далан давхарт хүнээ оршуулж байгаагаас илүү олон нохой, муур хөрсөнд булж байна

Гэрийн тэжээвэр амьтны тухай хуулийн төслийг хэлэлцэж байна. Уг хуулийн төсөл нь анхдагч бөгөөд өмнө нь энэхүү харилцааг зохицуулж байгаагүй гэдгээрээ онцлог аж. Түүнчлэн жил бүр нохой, муурыг устгахад төсвөөс 1.6-1.8 тэрбум төгрөгийг зарцуулж байгаа гэсэн тооцооллыг уг хуулийн төслийг санаачлагч УИХ-ын гишүүн Б.Энхбаяр танилцууллаа. Гэрийн тэжээвэр амьтны асран хамгаалагч нь 18 нас хүрсэн, амьтнаа хоол, орон байраар хангах орлогын эх үүсвэртэй байх шаардлагатай талаар хуулийн төсөлд тусгажээ.УИХ-ын гишүүн Б.Энхбаяр “Аллага сурталчилсан, хүүхдэд сэтгэлзүйн гэмтэл учруулах байдлаар эзэнгүй нохой, муурыг устгахаа болих ёстой. Энэ бол хүнд чиглэсэн, хүний эрхтэй холбоотой хууль. Нохой муурыг алж устгаж хөрсөнд булж байгаагаас үүдэлтэй халдварт өвчин тархаж байна. Далан давхарт хүнээ оршуулж байгаагаас илүү олон нохой, муурыг хөрсөнд булж байна. Тиймээс энэ бол нийгмийн эрүүл мэнд талдаа чиглэсэн хууль юм. Мөн хайрыг түгээхэд чиглэсэн хууль. Хүмүүнлэг, иргэний, энэрэгүй нийгмийн хөгжүүлэх суурь болсон хууль юм шүү. Амьтныг хайрлаж өссөн хүүхэд том болоод хүнийг хайрладаг болно” хэмээн тодотгов.