LVMH группийн үүсгэн байгуулагч Бернар Арногийн хөрөнгийн хэмжээ $200 тэрбумд хүрчээ

Тансаг эдлэлийн брэндүүдийг эзэмшигч Францын LVMH группийн үүсгэн байгуулагч Бернар Арногийн хөрөнгийн хэмжээ саяхан анх удаа $200 тэрбумд хүрчээ. Ингэснээр хөрөнгийн хэмжээ нь 200 тэрбумын босгыг давсан гурав дахь хүн болж түүхэнд бичигдэж байна. Арногоос өмнө Теслагийн Илон Маск, Амазоны Жэф Безос нар энэхүү өндөр босгыг даваад байсан юм. Мягмар гарагийн арилжааны үеэр Арногийн хөрөнгийн хэмжээ $2.4 тэрбумаар өсөж, $201 тэрбумд хүрсэн тухай Блүүмбэрг мэдээлжээ. LVMH групп нь Louis Vuitton, Tiffany & Co., TAG Heuer, Christian Dior зэрэг хувцас хэрэгсэл, цүнх, бугуйн цаг, гоо сайхны тансаг ангиллын олон брэндүүдийг эзэмшдэг. Арно бизнесээ өөрийн гэр бүлийн хүрээнд удирддаг. Түүний таван хүүхэд группийнх нь янз бүрийн салбарыг тэргүүлдэг байна.