Д.Сарангэрэл БОАЖ-ын сайдаар ажиллаж байх үед 756.8 га тусгай хамгаалалттай газарт зөвшөөрөл олгогджээ

Монгол Засгийн газраас 2023 оныг “Авлигатай тэмцэх жил” болгон зарлаж, Ерөнхий сайд Л.Оюун-Эрдэнийн санаачилсан тогтоолын төслийг батлан, “5Ш” ажиллагааг явуулна гэдгээ албан ёсоор зарласан. Үүний нэг болох Шилэн ажиллагааны хүрээнд тусгай зөвшөөрөл эзэмшигчдийн мэдээллийг нийтэд ил болгож эхлээд буй. Өнөөдөр л гэхэд ЦХХХ-ны сайд Н.Учрал мэдээлэл хийж, Богдхан уулын 2973 га болон Хөвсгөлийн байгалийн цогцолборын 501 га газрын мэдээллийг ил тод болгож байгааг мэдэгдсэн. Тодруулбал shilen.gov.mn сайтад тавигдсан тусгай хамгаалалттай газрын мэдээллээс газар олгосон огноогоор , 2020 онд хамгийн өндөр буюу 756.8 га тусгай хамгаалалттай газарт зөвшөөрөл олгожээ. Тухайн үед БОАЖ-ын сайдаар УИХ-ын гишүүн Д.Сарангэрэл ажиллаж байсан билээ.