Б.Чойжилсүрэн: 2023-2024 онд Эрдэнэбүрэнгийн усан цахилгаан станцын бэлтгэл ажил бүрэн дуусна

Засгийн газрын ээлжит хуралдаанаас гаргасан шийдвэрүүдийг танилцуулж байна.-Эрчим хүчний сайд Б.Чойжилсүрэн:Тэрбээр, "Эрдэнэбүрэнгийн усан цахилгаан станцын талаар авах арга хэмжээний талаар тогтоол баталлаа. Тогтоолоор дөрвөн зүйлийг шийдсэн. Эхнийх нь техник хяналтын зардлын 5 сая ам.доллар юм. Зардлыг 2024-2027 оны улсын төсөвт суулгахаар Засгийг газрын тогтоол гарсан. Хоёрдугаарт, Эд хөрөнгийн нөхөн үнэлгээний үлдэгдэл төлбөр 4 орчим тэрбум төгрөг байгаа. Энэ эх үүсвэрийг 2024 оны улсын нэгдсэн төсвийг батлах үед суулгана. Гуравдугаарт, иргэдэд нэг удаа олгох нөхөн төлбөр бий. Нийт 1241 иргэн байгаа. Энэ хүмүүст 13.3 тэрбум төгрөгийн нөхөн олговор олгох үлдэгдэл бий. Үүнийг 2024 онд багтаан дуусгана. Дөрөвдүгээрт, Эрдэнэбүрэнгийн усан цахилгаан станцын нөлөөлөлд автахаар соёлын үүд байгаа. Үүнийг авран хамгаалах ажиллагаанд 6 орчим тэрбум төгрөг шаардлагатай. Энийг 2024 оны төсөвт суулгах шийдвэр гарсан. Ингээд 2023-2024 онд багтаагаад Эрдэнэбүрэнгийн усан цахилгаан станцын бэлтгэл ажил буюу иргэдийг нүүлгэн шилжүүлэх, соёлын өвийг авран хамгаалах ажил бүрэн дуусна. 2023 оны төсөвт суусан зардлуудаар манай яам болон Соёлын яам ажиллаж байгаа. Нөгөөдөр буюу гуравдугаар сарын 31-нд Хятадын ЭКЗИМ банк худалдааны яамнаас Төрийн зөвлөлтэй  Эрдэнэбүрэнгийн усан цахилгаан станцын талаар мэдээлэл хүргэнэ. Учир нь, 250 сая ам.доллароос дээш дүнтэй хөрөнгө оруулалтыг Төрийн зөвлөлөөр батлуулдаг нь Хятад Улсын зохицуулалт бий. Үүгээр дэмжигдсэний дараа зээлийн тусгайлсан хэлэлцээрийг энэ оны хоёрдугаар улиралд багтаан хийх төлөвлөгөөтэй байна. Энэ асуудлаар Хятадын холбогдох албан тушаалтнуудтай уулзаж, ийм үр дүнд хүрсэн" гэв.