Ж.Сүхбаатар: Нийслэлийн төсвийн 420 тэрбумаас 100 орчим тэрбум нь газар чөлөөлөлтөд зарцуулагдсан

Засгийн газрын өнөөдрийн /2023.03.22/ хуралдаанаар гаргасан шийдвэрийг танилцуулж дууслаа. Засгийн газрын хуралдаанаар Улаанбаатар хотын автозамын түгжрэлийг бууруулах хүрээнд хэрэгжүүлж буй  төслүүдийн талаар Ж.Сүхбаатар сайд дэлгэрэнгүй мэдээлэл хийсэн байна.  Энэ хүрээнд буюу  түгжрэлийг бууруулах хүрээнд 2023, 2024 онд авч хэрэгжүүлэх ажлаар Ж.Сүхбаатар “Бидний хувьд түгжрэлийг бууруулах асуудлыг хоёр талт байдлаар авч үзэж байгаа. Нэг нь, төвлөрлийг сааруулах бодлогын ажлууд, нөгөөх нь түгжрэл буурах тодорхой  зорилтод чиглэсэн төсөл арга хэмжээнүүд байгаа. Ерөнхий сайд болон салбар яамдын удирдлагууд сүүлийн үед “Сэлбэ сэргэлт”-ийн  төслийн асуудлыг нэлээн чухалчилж байгаа. Энэ бол Улаанбаатар хотын аятай тухтай орчин, хот тохижилт, хүмүүсийн түгжрэлд саатаж байгаа энэ олон гацааг арилгах боломжит төсөл гэж үзэж байгаа. Өнөөдөр бас Сэлбэ сэргэлтийн төслийг ажлыг хэлэлцэж, дэмжлээ. Тиймээс энийг төр, хувийн хэвшлийн  түншлэлээр явуулах боломжийг судлахыг холбогдох албаныханд даалгасан. Ажлыг хэсэг байгуулахаар шийдвэрлэгдсэн. Зураг төслийн ажлын асуудлыг Хотын удирдлага, БХБЯ хамтарч хийнэ. Өнгөрсөн жил нийслэлийн төсвөөр 420 тэрбумын олон ажлууд эхэлсэн. 100 тэрбум орчмоор нь газар чөлөөлөлт, боловсролын асуудал гэхчлэн зарцуулагдсан. Үлдсэн багагүй мөнгөөр бид явган хүний зам, унадаг дугуйн зам гэхчлэн замын ажлуудыг эхлүүлчихсэн байсан. Энэ ажлууд маань харамсалтай нь 2023 оны төсөвт тусгагдаагүй учраас зогссон. Тиймээс энэ ажилд 342,5 тэрбум төгрөгийн санхүүжилтийг олох эх үүсвэрийг Сангийн сайд Б.Жавхлан, Хотын дарга Д.Сумъяабазар нарт даалгасан байгаа. Ингэснээр өнгөрсөн жилүүдэд хийсэн ажлынхаа үр дүнг үзэх боломжтой болно. Түгжрэлийг 2024 онд 50 хүртэлх хувиар буурлна гэдэг зорилтыг тавиад явж байна. Түүнчлэн Хөшигийн хөндийн ажил түгжрэлийг бууруулах гол ажил байгаа” хэмээв.