Цэцэрлэгийн багшдаа зодуулсан гэх хүүхдийн гэмтлийг шинжээч эмч томилон шалгаж байна

Цагдаагийн байгууллагад өчигдөр /2023.03.21/ "Охиныг минь цэцэрлэгийн багш нь зодож гэмтэл учруулсан байна" гэх мэдээлэл бүртгэгджээ. Дуудлага, мэдээллийн дагуу Баянгол дүүргийн цагдаагийн хоёрдугаар хэлтсээс шалгалтын ажиллагаа явуулж байна. Охины гэмтэлд зэрэг тогтоолгохоор шинжээч эмч томилуулсан. Гэмтлийн зэргээс шалтгаалан эрүүгийн хэрэг эсвэл зөрчлийн хэрэг нээх эсэхийг шийднэ. Хэрэв гэмтлийн зэрэг тогтоогдвол эрүүгийн хэрэг нээн шалгах саналыг прокурорт танилцуулах аж. Энэ тухай хүүхдийн ар гэрээс "Багшаас нь асуухад "Анги дээрээ тоглож байхад нь өөр хүүхэд ийм болгочихлоо" гэсэн хариу тайлбар өгсөн. Гэвч хөхрөлтөөс харахад бага насны ялангуяа хоёрхон настай хүүхдийн хийх үйлдэл яавч биш байсан. Иймд цэцэрлэгийн камер шүүж үзтэл багш нь охиныг минь хаалганаас эхлэн чирч газар унах үед гарнаас нь дээш татан савчсан байна. Мөн ариун цэврийн өрөө рүү авч орон 5 минут орчим болж буй дүр зураг харагдлаа. Хоёрхон настай хүүхэд минь хүчирхийллийн золиос биш" хэмээн цахим хуудсандаа бичжээ. Харин энэ мэдээллийг цэцэрлэгийн удирдлагын зүгээс үгүйсгэсэн байна.